Адыгэ Республикэм и Къэралыгъо быракъ и Мафэ фэгъэхьыгъэ зэхахьэр Тэхъутэмыкъое районым культурэмкIэ и Унэшхо щыкIуагъ.

Тэхъутэмыкъое районым иадминистрацие ипащэу Шъэо Аскэр, инароднэ депутатхэм я Совет итхьаматэу Хьатитэ Алый, Тэхъу­тэмыкъуае инахьыжъхэм я Совет ипащэу Гунай Аслъан, районым и Адыгэ Хасэ итхьаматэу Ацумыжъ Юсыф, ныбжьыкIэ драматическэ театрэу Ахэджэго Мэджыдэ ыцIэ зыхьырэм ипащэу Шалэ Рустам зэхахьэм къыщыгущыIагъэх.

Адыгэ Республикэм и Къэралыгъо быракъ и Мафэ Дунэе Адыгэ Хасэм иунашъокIэ Адыгеим имызакъоу, Къэбэртэе-Бэлъкъарым, Къэрэщэе-Щэрджэсым, Краснодар краим, IэкIыб къэралыгъохэу тилъэпкъэгъухэр зыщыпсэухэрэм ащагъэмэфэкIы. Быракъым адыгэхэр зэрэзэфищэхэрэh, лъэпкъхэм язэпхыны­гъэхэр зэригъэпытэхэрэр, адыгэ быракъым итарихъ зэхахьэм къы­щаIотагъэх. Адыгэ быракъыр республикэм и Къэралыгъо тамыгъэ шъхьаIэхэм ащыщ зэрэхъу­гъэр мэфэкIым щыхагъэунэфыкIыгъ. Концертэу къатыгъэм лъэпкъ шIэжьым ехьылIэгъэ усэхэм къы­щяджагъэх.

Адыгэ Республикэм изаслуженнэ артисткэу Лъэцэр Римэ «Адыгэ хэку» зыфиIорэ орэдымкIэ концертыр къызэIуахыгъ. Респуб­ликэм изаслуженнэ артистхэу Ацумыжъ Адам, Къэлэкъутэкъо Инвер, артистхэу Трахъо Динарэ, Мышъэ Азидэ, нэмыкIхэм орэдхэр къаIуагъэх.

Ансамблэхэу «Уджыр», «Адыгэхэр», фэшъхьафхэри пчыхьэзэхахьэм хэлэжьагъэх. ОрэдыIо лъэпкъ студиеу «Къамылым» композиторэу Анзэрэкъо Чеслав ыусыгъэ орэдэу «Адыгэ быра­къыр» ыгъэжъынчыгъ.

Краснодар краим ипсэупIэу Северскэм истудентхэм «Некрасов къэзэкъхэм якъашъу» зыфиIорэр гум рихьэу къашIыгъ.

Лъэпкъхэр зэфэзыщэрэ рес­публикэ къэралыгъо быракъыр пчыхьэзэхахьэм щагъэбыбэтагъ. Мэфэ зэIукIэгъур адыгэ къашъо­хэмкIэ аухыгъ.