Хэгъэгум иджэрз
Урысыем теннис цIыкIумкIэ изэнэкъокъоу суперлигэм щыкIорэм икIэух зэIукIэгъухэр Казань щыкIуагъэх.
Адыгэ къэралыгъо университетым ихъулъфыгъэ хэшыпыкIыгъэ командэ я 4-рэ едзыгъом хэхьэрэ ешIэгъухэм ахэлэжьагъ.
Едзыгъуи 4-мэ очко 37-рэ къащихьи, «Фыщт-АГУ-м» ящэнэрэ чIыпIэр суперлигэм къыщыдихыгъ. Тиспортсменхэм джэрз медальхэр къафагъэшъошагъэх.
Казань щызэхащэгъэ кIэух зэнэкъокъум хэгъэгум икоманди 10 ыкIи Казахстан къикIыгъэ купыр щызэIукIагъэх. Москва, Санкт-Петербург, Барнаул, Краснодар, Самарэ, Тюмень, нэмыкIхэм якомандэхэр апэрэ чIыпIэм фэбэнагъэх.
«Фыщт-АГУ-м» хэтхэу Виталий Шумаковыр, Сергей Павлиныр, Павел Ковенкэр, Марат Мукамбетовыр, Александр Воронцовыр, Александр Семеновыр, Дмитрий Молчановыр гуетыныгъэ ахэлъэу теннис ешIагъэх. Адыгэ къэралыгъо университетым, Мыекъопэ къэралыгъо гуманитарнэ-техническэ колледжым кIалэхэр ащеджэх.
Адыгэ Республикэм теннисымкIэ и Федерацие итхьаматэу Юрий Гороховымрэ Адыгэ къэралыгъо университетым физическэ пIуныгъэмкIэ икафедрэ идоцентэу, тренерэу Владимир Сидоровымрэ спортсменхэр зэнэкъокъум фагъэхьазырыгъэх.
Хэгъэгум изэнэкъокъу джэрзыр къыщыдэзыхыгъэхэм, кIэлэегъаджэхэм, тренерхэм тафэгушIо. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм пэгъокIыхэзэ, республикэм ищытхъу нахь лъагэу спортышхом щаIэтынэу афэтэIо.