Адыгеим зыфэдэ къэмыхъугъэ чIыопс байныгъэхэр иIэх, зекIо къакIохэрэм зыщагъэпсэфынымкIэ ыкIи къызэрагъэIэзэнхэмкIэ амалышIухэр мыщ щагъотыщтых.

Ащ къыхэкIэу зекIоным илъэ­ныкъо шъхьаIэхэм ащыщ хъугъэ Адыгеим иIэзэгъупсхэр къыз­фэгъэфедэгъэнхэр.

Мы аужырэ лъэхъаным бальнеологическэ туризмэм нахь хахъо зэрэхъугъэм къыхэкIэу Адыгеим зекIохэм афытегъэ­псыхьэгъэ комплексхэу ща­шIыхэрэми япчъагъэ хэхъуагъ. Джырэ лъэхъаным диштэрэ гъэпсэфыпIэ гупчэхэм ащыщ хъугъэ парк-хьакIэщэу «ПсыгупсэкIэ» зэджагъэхэр. Мые­къопэ районым ит псэупIэу Удобнэм ар щашIыгъ ыкIи бэмышIэу агъэфедэ хъугъэ.

Адыгеим и ЛIышъхьэу КъумпIыл Мурат инвестпроектым игъэцэкIэн зэрэкIорэм нэIуасэ зыфишIыгъ. Мыщ къэкIуагъэх федеральнэ инспектор шъхьа- Iэу Сергей Дрокиныр, Адыгэ Республикэм зекIонымкIэ ыкIи гъэпсэфыпIэхэмкIэ и Комитет итхьаматэу Былымгъот Ибра­хьимэ, муниципальнэ образованиеу «Мыекъопэ районым» ипащэу Олег Топоровыр.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Псыгупсэм» ипащэу Руслан Сафиуллиным къызэриIуагъэмкIэ, проектыр илъэс заулэм къыкIоцI гъэцэкIагъэ хъугъэ ыкIи зыфытегъэпсыхьагъэр цIыфхэм яфэIо-фашIэхэр дэгъоу зэшIохыгъэнхэр ыкIи уасэхэр «мыцакъэу» щытынхэр ары. Проектым иапэрэ чэзыу гъэцэкIагъэ хъугъэ, тхьамафэкIэ узэкIэIэбэжьмэ комплексыр зызгъэпсэфыхэрэм апае къызэIуахыгъ.

ГъэпсэфыпIэ гупчэм жъогъуи 4 хъурэ хьакIэщэу номер 32-рэ зыхэтыр, псыфабэ зэрыт бассейнищыр, IэрышIэ псыкъе­фэххэр, массаж лъэпкъ зэфэшъхьафхэр зыщашIыщт чIыпIэхэр хэхьэх. Бассейнэм ит псыр мафэм къыкIоцI бэрэ зэблахъу. Кислород хагъахьэ, пчыхьэ къэс бассейнэр зы­зэфашIыжькIэ санитарнэ ыкIи тех­ническэ фэIо-фашIэхэр агъэ­цакIэх. Мыщ дэжьым къэIогъэн фае псым Iэзэгъу нэшанэу иIэхэр ахэм апкъ къикIэу зэ­блэхъугъэ зэрэмыхъухэрэр.

«Псыгупсэм» зызщагъэ­псэфыщт чIыпIэ, кафе, ресторан, тренажер залыр ыкIи кIэлэцIыкIу клубыр, ыпкIэ хэмылъэу транспортыр зыщагъэуцущтыр хэ­хьэх. Видеолъыплъэным исистемэ ащ хэт, зыгорэкIэ машIом зыкъыштэмэ, макъэ къэзгъэIущт пкъыгъори хагъэуцуагъ.

Мы илъэсым бжыхьэм ехъулIэу ятIонэрэ чэзыур атIупщыщт, ащ хэтыщтых спортзалыр, бассейнэхэр зиIэ унэ цIыкIухэр ыкIи нэмыкIхэр. Iэзэгъупсхэм анэмыкIэу фитнесым, спор­тым мыщ щапылъынхэ алъэкIыщт. Ахэм яшIуа­гъэкIэ зызгъэпсэфыхэрэм япсауныгъэ нахь пытэщт. Проектым кIэщакIо фэ­хъугъэхэр а лъэныкъохэм атегущыIагъэх.

«ТэркIэ мэхьанэшхо иI зекIохэм агукIэ ашIоигъоу Адыгеир зызщагъэпсэфын алъэкIыщт чIыпIэу къызэрэхахырэм. ЩыIэ­ны­гъэм къызэригъэлъагъо­рэмкIэ, цIыфхэм зекIоным нэмыкIэу санаторнэ-курорт фэIо-фашIэхэр къафагъэцэкIэнхэм ащ нахь мэхьэнэ цIыкIоп аратырэр. Арышъ, Адыгеим амалышIоу иIэр зэкIэ нахь икъоу къызфигъэфедэ­шъущт. Джырэ уахътэм диштэрэ ащ фэдэ гупчэхэр республикэм нахьыбэу иIэнхэ, фэIо-фашIэхэр нахь дэгъоу цIыфхэм ­афэгъэцэкIэгъэнхэм ахэр атегъэпсыхьэгъэнхэ фае. Арышъ, инвестпроектхэу амалышIухэр къэзытыхэ­рэм тынаIэ атедгъэтыщт, зекIо бизнесым хэхъоныгъэ ышIыным пае амалхэр едгъэгъотыщтых», — къы­Iуагъ КъумпIыл Мурат.

Шъугу къэтэгъэкIыжьы, Адыгеим иинфраструктурэ тапэкIи хэхъоныгъэ ышIыным пае лъэпкъ проектэу «Туризм и индустрия гостеприимства» зыфиIорэр пхырыщыгъэн фае. БэмышIэу корпорациеу «Туризм.РФ» зыфиIорэм зэзэгъыныгъэ дэтшIыгъ. Ащ фэдэ зэдэлэжьэныгъэм республикэм амал къы­ритыщт инфраструктурнэ Iофыгъо заулэхэмкIэ ищыкIэгъэ Iофтхьабзэхэр зэшIотхынхэу ыкIи стратегическэ мэхьанэшхо зиIэ проектыр — лыжэхэмкIэ къызщакIухьан алъэкIыщт экокурортэу «Лэгъонакъэ» игъэпсын пхырыщыгъэ­нымкIэ.

АР-м и ЛIышъхьэ ипресс-къулыкъу Сурэтхэр А. Гусевым