Мэлылъфэгъум и 26-р — радиацием епхыгъэ тхьамы­кIагъохэм къыздахьыгъэхэм ядэгъэзыжьын хэлэжьагъэхэм я Маф. Гум имыкIыжьырэ ошIэ-дэмышIагъэр къызыхъугъэр илъэс 36-рэ хъугъэ. Ащ фэгъэхьыгъэ зэхахьэ черно­быль­цэхэм ясаугъэт дэжь щыкIуагъ.

Адыгэ Республикэм IофшIэнымкIэ ыкIи со­циальнэ хэхъоныгъэмкIэ иминистрэу Мырзэ Джанбэч къэзэрэугъоигъэхэм шIуфэс къарихыгъ. ХэмыкIокIэжьын лъэужэу тарихъым къыхэнэгъэ хъугъэ-шIагъэм илъэс 36-рэ зэрэтешIагъэр ащ къы­хигъэщыгъ. А уахътэм къыкIоцI лIэужыбэ къызэрэхъугъэр, ау а тхьамыкIагъом идэгъэзыжьын хэлэжьагъэхэм лIыхъужъныгъэу зэрахьагъэр цIыф­хэм зэращымыгъупшэщтыр министрэм къыIуагъ.

— Адыгеим и ЛIы­шъхьэу КъумпIыл Мурат ыцIэкIи, сэ сшъхьэкIи ра­диацием епхыгъэ тхьа­мыкIагъохэм ядэгъэзы­жьын хэлэжьагъэхэм «тхьашъуегъэпсэу» ясэ- Iо. ГухэкI нахь мышIэми, ахэм ащыщыбэхэм ядунай ахъожьыгъ. Къэралыгъо хабзэм икъулыкъухэм ялIыкIохэм псаоу къэнэгъэ нэбгырэ пэпчъ зэпхыныгъэ адыряI, ящыкIэгъэ IэпыIэгъур арагъэгъотыным фэхьазырых, — къы­Iуагъ Мырзэ Джанбэч.

Чернобыль къыщыхъугъэ аварием къыздихьыгъэ тхьамыкIагъохэм ядэгъэзыжьын бэ хэлэжьа­гъэр. Адыгеим икIыгъэ нэ­бгырэ 800 фэдизыр ахэм ащыщых. Ахэм шъхьа­щэ зэрафашIырэр ыкIи зэрафэразэхэр къэгущыIэгъэ пстэуми къа­Iуагъ, псауныгъэ пытэрэ насыпрэ ежьхэми, яунагъохэми яIэнэу къафэлъэ­Iуагъэх.

Зэхахьэм икIэух чернобыль тхьамыкIагъом идэгъэзыжьын хэлэжьагъэхэу зидунай зыхъожьыгъэхэм яшIэжь агъэлъапIэзэ, къэ­зэрэугъоигъэхэр зы та­къикърэ афэшъыгъуагъэх, саугъэтым къэгъагъэхэр кIэралъхьагъэх.

Iэшъынэ Сусан. Сурэтыр Iэшъынэ Ас­лъан тырихыгъ.