Урысыем и Следственнэ комитет и Тхьаматэу А. И. Бастрыкиным къэбарлъыгъэIэс Гупчэм унашъо фишIыгъ Донецкэ ыкIи Луганскэ народнэ республикэхэм, джащ фэдэу Украинэм къарыкIыгъэхэу Урысые Федерацием къэкIуагъэхэм апае чэщ-зымафэм Iоф зышIэщт «линие плъыр» къызэIуахынэу.

Къулыкъум ипащэ иунашъо къыпкъырыкIыхэзэ, гупчэ аппаратым иследственнэ подразделениехэм ыкIи субъектхэм ашъ­­хьэ фимытхэу япсэупIэ къэзыбгынагъэхэу Донецкэ ыкIи Луганскэ народнэ респуб­ликэ­хэм, джащ фэдэу Украинэм къарыкIыгъэхэм чанэу Iоф ада­шIэ. Ащ дакIоу Украинэм щыхъу­рэ хъугъэ-шIагъэм зэрар хэзы­хыгъэхэр следствием егъэ­унэ­фы, джащ фэдэу правовой, со­ци­альнэ ыкIи медицинэ IэпыIэгъу арагъэгъоты, ахъщэ тынхэр аратынхэмкIэ, документхэр агъэ­псынхэмкIэ яшIуагъэ арагъэкIы.

Къэзыгъэзэжьыгъэхэр тикъэ­ралыгъо ишъолъыр зэфэшъхьафхэм къащыуцугъэх ыкIи «линие плъырым» ишIуагъэкIэ къэбархэмкIэ псынкIэу зэхъо­жьынхэ алъэкIыщт. КъэбарлъыгъэIэс Гупчэм икъулыкъушIэхэм къэзыгъэзэжьыгъэхэр зыфэдэхэр агъэунэфыщт, яфитыныгъэхэр агурагъэIощт. IофшIэным зэ­фэхьысыжьэу фэхъурэм елъытыгъэу украинцэхэу бзэджэшIагъэ зезыхьагъэхэм уголовнэ Iофхэр къафызэIуахыщтых.

Мыщ фэдэ екIолIакIэм ишIуа­гъэкIэ къэзыгъэзэжьыгъэхэм псынкIэу IэпыIэгъу афэхъущтых. ЗэдэгущыIэгъухэр къызфагъэфедэхэзэ Следственнэ комитетым бгъу пстэумкIи цIыфхэм юридическэ IэпыIэгъу аригъэгъо­тын ыкIи ахэм яшIоигъоныгъэхэр къыухъумэнхэ ылъэкIыщт.

Къэзыгъэзэжьыгъэхэм къэбарлъыгъэIэс Гупчэр афэгъэзэгъэщт ыкIи ахэм якъэбар социальнэ хъытыухэу ВКонтакте (https: //vk.com infocentrskrf) ыкIи Телеграм-каналэу (https: t. me/ infocentrskrf) арытыщтых.

«Линие плъырым» ителефон номер мы мэфэ благъэхэм Урысыем и Следственнэ комитет исайт ыкIи ведомствэм исоциальнэ хъытыухэм къарыхьащт.