Мэлылъфэгъум и 26-р — радиацие авариехэм къызыдахьыгъэхэм ядэгъэзыжьын хэлэжьагъэхэм я Маф, ащ фэдэ тхьамыкIагъохэм ахэкIодагъэхэр агу къызыщагъэкIыжьырэ Маф
Адыгэ Республикэм щыпсэухэу лъытэныгъэ зыфэтшIыхэрэр! ТичIыпIэгъу лъапIэхэр!
1986-рэ илъэсым мэлылъфэгъум и 26-р цIыфлъэпкъым итарихъ хъугъэ-шIэгъэ гомыIукIэ хэхьагъ. Мы мафэм Чернобыльскэ АЭС-м къыщыхъугъэ авариер дунаимкIэ анахь техногеннэ тхьамыкIэгъошхоу хъугъэ.
Чернобыль къыщыхъугъэ тхьамыкIагъор тыгу къэдгъэкIыжьзэ, лIыгъэ зезыхьэзэ, зыпсэ емыблэжьэу ядернэ аварием къыздихьыгъэхэм ядэгъэзыжьын хэлэжьагъэхэм илъэс къэс ягугъу шIукIэ тэшIы, цIыфхэр къагъэнэжьхэзэ зыпсэ зытыгъэхэм шъхьащэ афэтэшIы.
ЛIыхъужъныгъэрэ псэемыблэжьныгъэрэ къызхэзыгъэфагъэхэр егъашIэм ныбжьыкIэхэмкIэ щысэтехыпIэу щытыщтых.
Радиацие авариехэм къыздахьыгъэхэм ядэгъэзыжьын хэлэжьагъэхэм псауныгъэ пытэ яIэнэу, ягъашIэ кIыхьэ хъунэу, шIоу щыIэр къадэхъунэу тафэлъаIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожный