Мы илъэсыр къызихьагъэм къыщегъэжьагъэу гъогухэм тхьамыкIагъоу къащыхъугъэхэм, ахэр къэмыгъэхъугъэнхэмкIэ Iофтхьабзэу зэрахьан фаехэм, кIэлэцIыкIухэр ахэм ащымы­фыкъонхэмкIэ Iофыгъоу щыIэхэм, урамхэм язытет ыкIи нэмыкIхэм щатегущыIагъэх Адыгэ Республикэм игъогухэм ящынэгъончъагъэкIэ Комиссием зэхэсыгъоу иIагъэм.

Адыгеим и ЛIышъхьэу КъумпIыл Мурат мы Iофтхьабзэр зэрищагъ. Зэхэсыгъом хэлэ­жьагъэх Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур, федеральнэ инспектор шъхьаIэу Сергей Дрокиныр, АР-м и МВД, АР-м и Прокуратурэ, муниципалитетхэм япащэхэр. Гъогухэм ящынэгъон­чъагъэкIэ ГъэIорышIапIэм ­ипащэ къызэриIуагъэмкIэ, мы илъэсым иапэрэ мэзищ гъогухэм аварие 76-рэ къатехъухьагъ, ахэм нэ­бгырэ 18 ахэкIодагъ. Рулым Iус­хэм ялажьэкIэ (ешъуагъэхэу агъэунэфыгъэх) аварии 8, рулым IутIысхьанхэмкIэ фиты­ныгъэу яIэр къэзыушыхьатырэ тхылъыр ыпэкIэ зыIахыгъэхэм ялажьэкIэ тхьамыкIэгъуи 2 къа­техъухьагъ.

Мы илъэсыр къызихьагъэм къыщегъэжьагъэу ешъуагъэу во­дитель 371-рэ къаубытыгъ. Мыекъопэ ыкIи Джэджэ районхэм авариеу къащыхъухэрэм япчъагъэ хэхъуагъ. Ар къызы­хэкIырэм фэгъэхьыгъэу ыкIи ахэм япхыгъэ Iофтхьабзэу зэра­хьагъэхэм яхьылIагъэу пащэ­хэм еплъыкIэу яIэхэр къаIуа­гъэх. Гъогухэм ящынэгъончъагъэкIэ пшъэдэкIыжь зыхьыхэрэм афэгъэзагъэу КъумпIыл Мурат щыкIагъэу яIэхэм ялъытыгъэу ахэм афигъэпытагъ.

«Республикэм игъогухэм къа­щыхъухэрэ тхьамыкIагъохэм къакIегъэчыгъэнымкIэ IофшIэным зэхъокIыныгъэ горэхэр фэшIыгъэнхэ фае. ЧIыпIэхэм япащэхэмрэ а Iофым фэгъэзэгъэ ведомствэхэмрэ нахь шIогъэ ин къэзытыщт унашъохэр зэдаштэнхэ фае. ЕтIани анахь щынагъоу щыт гъогухэм афэсакъынхэ, ащкIэ гъогухэм атырагъэуцорэ тамыгъэхэр, сигнальнэ пкъэухэр ыкIи нэмыкIхэр икъоу къызфагъэфедэнхэу щыт», — къыIуагъ КъумпIыл Мурат.

Гъогухэм атекIодэрэ, фыкъуа­гъэ ащыхъурэ кIэлэцIыкIу­хэм япхыгъэу Iофтхьабзэу зэ­рахьэ­хэрэм къатегущыIагъэх Адыгэ Республикэм гъэсэны­гъэмкIэ и Министерствэрэ гъо­гурыкIоным ищынэгъончъагъэкIэ ГъэIорышIапIэмрэ ялIыкIохэр. Ащ елъытыгъэу апэрэ классым кIорэ кIэлэцIыкIухэм апае нэфынэ къэзытырэ ныбэлъэ мини 6,3-м ехъу къащэфыгъ. Лъэпкъ проектэу «Автомобиль гъогу дэ­гъухэр» зыфиIорэм диштэу ГИБДД-м иIофышIэхэм гъэсэны­гъэ зыщарагъэгъотырэ учреж­дении 134-мэ гъогурыкIоным ишапхъэхэмкIэ сыхьатхэр ащызэхащагъэх. ЕджапIэм джыри мыкIорэ кIэлэцIыкIухэр зычIэс­хэм — сыхьат 28-рэ. Гъэмэфэ зыгъэпсэфыгъо уахътэр къызщыблагъэрэм ехъулIэу кIэлэ­еджакIохэм гъогурыкIонымкIэ шапхъэхэм япхыгъэ IофшIэн гъэ­нэфагъэ адызэхэщэгъэн зэ­рэфаер КъумпIыл Мурат анахьэу къыхигъэщыгъэхэм ащыщ.

Зэхэсыгъом къыщыгущыIагъ Мыекъуапэ имэр, ащ къызэ­рэхигъэщыгъэмкIэ, кIэлэцIыкIу­хэм­рэ Iэтахъохэмрэ анахьыбэу зы­щызэблэкIыхэрэ гъогухэм сакъыныгъэм епхыгъэ Iофтхьабзэхэр ащыгъэлъэшыгъэн фае: гъэсэныгъэ зыщарагъэгъотырэ организациехэм, паркхэм, стадионхэм, культурэмрэ псауныгъэм икъэухъумэнрэ япхыгъэ учреждениехэм адэжь.

КъызэраIуагъэмкIэ, гъэсэныгъэ зыщарагъэгъотырэ учреж­дениехэм къапэблэгъэ лъэс зэ­пырыкIыпIэ 52-рэ зэтырагъэ­псыхьагъ. Автомобиль гъогухэм, ахэм атет тамыгъэхэм, нэфрыгъуазэхэм ыкIи социальнэ мэхьанэ зиIэ нэмыкI псэуалъэхэм яIыгъынкIэ зэзэгъыныгъэхэр щыIэныгъэм щагъэцакIэх. Рес­публикэм и ЛIышъхьэ къалэм ипащэхэм анахьэу анаIэ зыты­ра­ригъэдзагъэр гъогухэм язытет ренэу ауплъэкIузэ ашIын, щыкIа­гъэу къыхагъэщыгъэхэр дэгъэзыжьыгъэнхэмкIэ игъом Iофтхьа­бзэхэр зэшIуахынхэ зэ­рэфаер ары. МэшIокугъогу зэпырыкIыпIэхэм тхьамыкIагъохэр къатемыхъухьанхэмкIэ Iофэу ашIэрэм икIэуххэм хэушъхьафыкIыгъэу мы зэхэсыгъом щатегущыIагъэх. Темыр-Кавказ мэшIоку гъогумрэ Адыгеяавтодорымрэ япащэхэм къызэрэхагъэщыгъэмкIэ, респуб­ликэм мэшIокугъогу зэпырыкIыпIэ 43-рэ иI. Ахэр гъэкIэжьыгъэнхэмкIэ ренэу IофшIэн гъэ-­ нэфагъэ зэшIуахы.

ЛIышъхьэм Темыр­ Кавказ мэ­шIоку гъогум ипащэ­хэм анаIэ зытыраригъэдзагъэр санитарием ылъэныкъокIэ шэпхъэ гъэнэфагъэу щыIэхэм мэ­шIоку зэпы­рыкIыпIэхэр адиштэнхэр ары. Республикэм имэ­шIоку гъогухэр гъэкIэжьыгъэнхэм ылъэ­ныкъокIэ нахь проект инхэр зэрэтищыкIагъэхэр хагъэунэ­фыкIыгъ.

АР-м и ЛIышъхьэ ипресс-къулыкъу Сурэтхэр А. Гусевым тыри­хыгъэх.