Адыгэ композитор цIэ­рыIоу, Адыгеим культурэмкIэ изаслуженнэ IофышIэу Бысыдж Мурат Асхьад ыкъом идунай ыхъожьыгъ.

Бысыдж Мурат Красногвардейскэ районымкIэ къуаджэу Джамбэчые 1932-рэ илъэсым жъоныгъуакIэм и 5-м къыщы­хъугъ. Мыекъопэ кIэлэ­егъэджэ институтым (джырэ АКъУ-м) итарихъ-фи­ло­логие факультетрэ Саратов дэт консерваторием ивокальнэ отделениерэ къыухыгъэх. Консерваториер къыухы зэхъум кантатэу «Адыгея моя» зыфи­Iорэр ыусыгъ. Адыгеим ипоэт цIэрыIомэ яусэхэм атехыгъэ музыкальнэ произведениипшI пчъагъэ, хорым, солистхэм, сим­фоническэ оркестрэм апае произведение заулэ ытхыгъ, ипублицистикэрэ иусэхэмрэ зыдэт тхылъи 6 къыдигъэкIыгъ.

Бысыдж Мурат илъэс зэфэшъхьафхэм Адыгэ радиокомитетым музыкальнэ къэтынхэмкIэ иредакторэу, Адыгэ хэку филар­монием ирежиссерэу, ихудожественнэ пащэу щытыгъ, илъэс 20 фэдизрэ кIэлэцIыкIу музыкальнэ еджапIэу N 2-м ипэщагъ, Адыгэ Республикэм культурэмкIэ и Министерствэ испециалист шъхьаIэу щытыгъ, музыкальнэ еджапIэхэмкIэ республикэ мето­дическэ кабинетым ипэщагъ, къэралыгъо телерадиокомпа­ниеу «Адыгеим» ирадио музыкальнэ, тематическэ къэтынхэр щызэхищэщтыгъэх. Республикэ студиеу IэкIыб къэралыгъохэм ащы­псэухэрэм апае къэтынхэр зыгъэхьазырырэм Iоф щишIэ зэ­хъум Бысыдж Мурат IэкIыб къэралыгъохэм арыс адыгэхэм агу рихьыгъэгъэ проектэу «Пщыналъ» зыфиIорэр зэхищэгъагъ.

IофшIэным иветеранэу, медалэу «За доблестный труд» зыфиIорэр къызыфагъэшъошэгъэ Бысыдж Мурат жъоныгъуакIэм и 5-м ыныбжь илъэс 90-рэ хъущтгъагъэ...

Зидунай зыхъожьыгъэм иунагъорэ иIахьылхэмрэ тафэтхьау­сыхэ. ЩымыIэжьым Тхьэм джэнэт лъапIэ къырет.