ЯгъэцэкIэжьын лъагъэкIуатэ
УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщ «Щынэгъончъэ ыкIи шэпхъэшIухэм адиштэрэ гъогухэр» зыфиIорэр.
Ащ къыдыхэлъытагъэу мы илъэсым Адыгеим иавтомобиль гъогухэм ячIыпIэ 34-рэ агъэцэкIэжьыщт. КилометрэкIэ къэплъытэмэ, 33-рэ фэдиз мэхъу.
Мыекъуапэ иурамэу Пушкиным ыцIэ зыхьырэм игъогу километри 4 ахэм къахеубытэ. Лъэпкъ проектым къыдыхэлъытагъэу Адыгеим икъэлэ шъхьаIэ щагъэцэкIэжьыщт гъогу Iахьхэм ар анахь кIыхьэу мэхъу.
— Мы урамым къэлэ паркым ишъолъыр къыщежьэ, А. С. Пушкиным ыцIэ зыхьырэ Лъэпкъ театрэу блэкIыгъэ илъэсым зэтырагъэпсыхьажьыгъэр тет, еджэпIэ зытIущымэ, АКъу-м, МКъТУ-м яунэхэм ащыщхэм мы гъогум уарещалIэ, — къыщыхагъэщыгъ Росавтодорым ипресс-къулыкъу.
Мы лъэпкъ проектым къыдыхэлъытэгъэ Iофтхьабзэу 2022-рэ илъэсым Адыгеим щызэшIуахыщтхэм сомэ миллиарди 2,3-рэ зэкIэмкIи атефэщт. Ащ щыщэу сомэ миллион 850-р — федеральнэ, сомэ миллиардрэ миллион 400-р республикэ бюджетхэм къахэхыгъэщт.