Гъобэкъое гурыт еджапIэм общественностыр зыхэлэжьэгъэ зэхэхьэшхо бэмышIэу щыIагъ. Ар зыныбжь имыкъугъэ кIэлэцIыкIухэм зэрахьэгъэ бзэджэшIагъэм фэгъэхьыгъагъ. Къэралыгъо автоинспекторхэм Iашэр амыгъэфедэфэ, гъогурыкIоным ишапхъэхэр аукъозэ, апэкIэ къикIырэ машинэм игъогу техьэхэзэ автомобиль псынкIэр зезыфэщтыгъэ ныбжьыкIэхэр къафэуцугъэхэп.

Iофтхьабзэм хэлэжьагъэх Теуцожь район администрацием ипащэу, гъогурыкIоныр щынэгъон­чъэнымкIэ район комиссием итхьаматэу Хьачмамыкъо Азэмат, гъогурыкIоныр щынэгъончъэнымкIэ Къэралыгъо инспекцием и ГъэIорышIапIэу АР-м щыIэм ипащэ игуадзэу, полицием иполковникэу Едыдж Мурат, Теуцожь районым ипащэ игуа­дзэу, зыныбжь имыкъугъэхэм яIофхэмкIэ ыкIи яфитыныгъэхэр къэухъумэгъэнхэмкIэ комиссием итхьаматэу Бэгъушъэ Борис, гъогу-патруль къулыкъум ихэу­шъхьафыкIыгъэ батальон икомандирэу, полицием иподполковникэу Тхьаркъохъо Юсыф, Къэралыгъо автоинспекцием иотделэу Адыгэкъалэ щыIэм ипащэу Чэтыжъ Мурат, къоджэ псэупIэм иобщественность илIыкIохэр ыкIи иадминистрацие иIофышIэхэр, кIэлэегъаджэхэр, ны-тыхэр, кIэлэеджакIохэр.

Зэхахьэр зэрищагъ Гъобэ­къое гурыт еджапIэм ипащэу СтIашъу Къэплъан.

ЫпшъэкIэ къызэрэщытIуагъэу, мэлылъфэгъум и 13-м, чэщым автомобиль псынкIэр полицейскэхэм къафэуцугъэп. Ащ ыпкъ къикIыкIэ гъогогъуи 5-рэ IашэкIэ дэоягъэх, етIанэ щэрэхъхэм гъогогъуи 2-рэ яонхэ фаеу хъу­гъэ. Нэужым автомобилыр псэупIэу Краснэм дэжь гъогу напцэм къыгоуцуагъ. 2005 — 2008-рэ илъэсхэм къэхъугъэ кIэлэ ныбжьыкIи 4 ащ къикIыгъэх. Мы хъугъэ-шIагъэм, Тхьэм ишыкуркIэ, цIыф хэкIодагъэп, шъобж хахыгъэп.

Ау, гухэкI нахь мышIэми, мы хъугъэ-шIагъэм ыуж мэфи 4 тешIагъэу Гъобэкъое чылэ кIоцIым хьылъэзещэ машинэшхом щеутэкIыгъэхэ кIэлэ ныбжьыкIитIур ыукIыгъэх.

Зэхахьэм Теуцожь районым ипащэу Хьачмамыкъо Азэмат къыщыгущыIэзэ къызэрэщыхигъэ­щыгъэмкIэ, зыныбжь имыкъугъэ­хэм зэрахьэгъэ бзэджэшIагъэм къыпкъырыкIыхэзэ Iофтхьэбзэ гъэнафэгъэхэр рагъэкIокIыгъэх: гъогурыкIоныр щынэгъончъэнымкIэ комиссием зэхэсыгъо иIагъ, ны-тыхэми кIэлэеджакIохэми зэдэгущыIэгъухэр адашIыгъэх. Мы Iофым гухэкI кIэух фэхъун зэрилъэкIыщтыгъэр ащ къыхигъэ­щыгъ. КъулыкъушIэхэм къафэмыуцурэ машинэм исын ылъэ­кIыщтыр къэшIэгъуае — наркомана, бзэджашIа, террориста? НыбжьыкIэхэм ящыIэныгъэ къы­зэтегъэнэгъэным фэIорышIэрэ пэшIорыгъэшъ Iофтхьабзэхэр агъэлъэшынхэу къэзэрэугъоигъэ­хэм ащ закъыфигъэзагъ.

Адыгеим и Къэралыгъо автоинспекцие ипащэ игуадзэу Едыдж Мурат Адыгэкъалэрэ Теуцожь районымрэ гъогу хъугъэ-шIагъэу мы илъэсым къащыхъугъэхэм зэфэхьысыжьхэр къафишIыгъэх, хэкIодагъэхэм ыкIи шъобжэу хахыгъэхэм къатегущыIагъ. Джащ фэдэу кIэлэцIыкIухэм япIун анаIэ нахь тырагъэтынэу ны-тыхэм ащ закъы­фигъэзагъ. Хэбзэгъэуцугъэм къызэрэдилъытэрэмкIэ, чэщым сыхьатыр 10-м кIэлэцIыкIухэр унэм исынхэу щыт, хъугъэ-шIагъэр зыхъугъэр чэщым сыхьатыр 3-р ары. Ащ фэдэ уахътэм зыныбжь имыкъугъэ Iэтахъор ма­шинэр зэрифэнымкIэ фитыныгъэ имыIэу автомобилым зэрисыр ашIэзэ, сыдэущтэу ны-тыхэр рэхьатэу щысынхэ алъэкIыра?

ГъогурыкIоным ишапхъэхэр кIэлэеджакIохэм зэрагъэшIэнхэу, еджапIэм кIохэ зыхъукIэ нэфынэр къэзытырэ ныбалъэхэр агъэфедэнхэу Едыдж Мурат ариIуагъ.

Батальоным икомандирэу Тхьаркъохъо Юсыф гущыIэр лъигъэкIотагъ. ЦIыфыбэм зэлъа­шIэгъэ хъугъэ-шIагъэу кIэлэеджа­кIохэм апкъ къикIыгъэр ежь ышъхьэкIэ къызыщыхъугъэ ыкIи зыщапIугъэ Теуцожь районым зэрэщыхъугъэр ыгу къызэреорэр ипсалъэ къыщиIуагъ. Мыщ нахь тхьамыкIэгъошхо къыхэкIын зэрилъэкIыщтыгъэр, машинэр зепфэнымкIэ фитыныгъэ уимыIэу рулым укIэрытIысхьэ зэрэмыхъу­щтыр, нэмыкIхэри кIэлэеджа­кIохэм къафиIотагъ.

Гум екIурэ псалъэ зэхахьэм къыщишIыгъ муниципальнэ образованием гъэсэныгъэмкIэ и ГъэIорышIапIэ ипащэу Блэгъожъ Налбый.

— Урысыем игражданин шъып­къэу ныбжьыкIэхэр пIугъэнхэм кIэлэегъаджэхэри, гъэсэныгъэм иучреждениехэм якупхэри зэрафэлъэкIэу ыуж итых. ТикIэлэцIыкIухэм янахьыбэр дэгъух, еджэкIо хъупхъэх, ау хэбзэукъо­ныгъэ зезыхьэгъэ зыныбжь имыкъугъэхэр джы къахэкIыгъэх, — къыIуагъ ащ.

ХэбзэухъумэкIо органхэм ялIыкIохэм ягугъу къэтшIымэ, яIофшIэн пшъэрылъхэр ахэм агъэцакIэщтыгъ ыкIи язекIуакIэ мытэрэзэу плъытэн плъэкIыщтэп. Водителым тытегущыIэмэ, игъу­сэгъэ нэбгырищмэ алъэныкъокIэ пшъэдэкIыжьэу ыхьырэр къыгурыIуагъэп, джащ фэд адрэ дисы­гъэхэри, игъом къэуцунэу иныб­джэгъу ахэм раIуагъэп.

Хьачмамыкъо Азэмат къызэриIуагъэмкIэ, Теуцожь районым ит анахь къоджэшхохэм Гъобэ­къуае ащыщ. Мыщ спортивнэ секциехэм Iоф щашIэ, культурэм и Унэ кружок зэфэшъхьафхэр иIэх, футбольнэ площадкэ апэрэу зыдашIыхьэгъэ чылэхэм ащыщ, атлетикэ онтэгъумкIэ зал дэт, мы уахътэм физкультурнэ парк цIыкIу щагъэпсы.

Гурыт еджапIэм ипащэ игуа­дзэу Теуцожь Фатимэ къызэрэхигъэщыгъэмкIэ, кIэлэцIыкIухэм япIункIэ еджапIэм зэшIуихырэр макIэп, ау ны-тыхэр ямыIэпыIэгъухэу кIэлэегъаджэхэм язакъо­кIэ Iофыр хъущтэп. Ны-ты пэпчъ ышIэн фае чэщым исабый зыдэщыIэр.

Гъобэкъое культурэм и Унэ ипащэу Тхьаркъохъо Дарыет къэгущыIагъэхэм адыригъэштагъ ыкIи къуаджэм дэс ныбжьыкIэхэм аныбжь елъытыгъэу языгъэпсэфыгъо уахътэ зыщагъэкIон алъэкIыщт чIыпIэхэр зэрэщыIэхэр хигъэунэфыкIыгъ. Культурэм, спортым зыкъыхагъо­тэн алъэкIыщт, тхылъеджапIэ дэт, кружок зэфэшъхьафхэм Iоф щашIэ. Зыныбжь имыкъугъэхэу хэбзэукъоныгъэ зезыхьагъэхэм ащыщ янэ къэзэрэугъоигъэхэм закъыфигъэзагъ. Пащэу, общественностым илIыкIоу къеблэ­гъагъэхэм, полицейскэхэу ныбжьыкIэхэм ящыIэныгъэ къэзыгъэнагъэхэм зэрафэразэр къыхигъэщыгъ. Джащ фэдэу икIалэ изекIуакIэ зэрэмытэрэзыр къызэрэгурыIорэр къыIуагъ ыкIи имысагъэ къыфагъэгъунэу къя­лъэIугъ.

Зэхахьэм икIэухым зэфэхьысыжь псалъэ къыщишIыгъ Теуцожь район администрацием ипащэу Хьачмамыкъо Азэмат.

— Мыщ фэдиз лIыкIор факIоу Гъобэкъое еджапIэм къызкIэкIуа­гъэр джащ нахьыбэрэ мыщ фэдэ хэбзэукъоныгъэхэр къэмыхъу­н­хэм фэшI. КIэлэцIыкIухэр нахьыбэу секциехэм, кружокхэм ахэщэгъэнхэ, зэгупшысэхэрэр, ашIэрэр ыкIи япсэукIэ зэгъэшIэгъэнхэ фае. НыбжьыкIэхэм языгъэпсэфыгъо уахътэ шIуагъэ къытэу агъэкIоным пае ищыкIэгъэ амалхэр ягъэгъотыгъэнхэм джыри тапэкIэ администрацием Iоф дишIэщт, фэлъэкIыщтыр ышIэщт, — къыIуагъ районым ипащэ.

НыбжьыкIэм ыгу сыдигъуи ехьыжьагъ, мэбыбатэ. ТхьамыкIагъом икуугъэ зэхамышIэу ахэм мыхъун зекIуакIэхэр къа­хэфэх. Ныбжьым зыхахъокIэ бэ къагурыIожьырэр, ау уахътэм къебгъэгъэзэжьышъурэп. Арышъ, тэ, ны-тыхэм, типшъэрылъыр зекIокIэ тэрэзхэр зэрахьанхэу зэрэщытыр зэпымыоу къафэтIотэныр ары. Ежьхэм ашъхьэ имызакъоу, лажьэ зимыIэ нэмыкI цIыфхэр якIодылIэнхэм ищынагъо къызэрэуцурэр агурыдгъэIонэу щыт.

2022-рэ илъэсым щылэ мазэм и 1-м къыщегъэжьагъэу мэлылъфэгъум и 20-м нэс республикэм игъогухэм аварие 99-рэ атехъу­хьагъ, ахэм нэбгырэ 22-рэ ахэкIодагъ, 104-мэ шъобж зэфэшъхьафхэр ахахыгъэх. Iэшъынэ Сусан.