Патриотическэ Iофтхьабзэу «Черкес десант» зыфиIоу Адыгэ Республикэм щызэхащагъэм кIэщакIо фэхъугъэр общественнэ организациеу «Урысые студенческэ отрядхэр» ары.

Ащ дырагъэштагъ Адыгэ Республикэм гъэсэныгъэмрэ шIэныгъэмрэкIэ и Министерствэрэ Шэуджэн ыкIи Красногвардейскэ районхэм яадминистрациехэмрэ. Организацием хэтхэр Шэуджэн районым щыIэ еджэпIэ-интернатэу сабый ибэхэр ыкIи сэкъатныгъэ зиIэхэр зыщаIыгъхэм щыIагъэх. Ахэм мастер-классхэр афызэхащагъэх, джэгукIэ шIыкIэм тетэу коммунальнэ фэIо-фашIэхэм ауасэхэр зэрэптыщтхэр къафаIотагъ. Джащ фэдэу сэнэхьат зэфэшъхьафхэм якъыхэхын ыкIи ахэр зыщызэбгъэгъотын плъэкIыщт еджапIэхэм нэIуасэ афашIыгъэх.

Красногвардейскэ районым ит еджапIэхэм якIэлэеджакIохэмрэ аграрнэ-промышленнэ техникумым истудентхэмрэ интерактивнэ джэгукIэхэр, мастер-классхэр афызэхащагъэх. НыбжьыкIэхэр спартакиадэм хагъэлэжьагъэх, атекIо- гъэ командэхэм шIухьафтынхэр аратыгъэх.

Джащ фэдэу Iофтхьабзэу «Черкес десантыр» окIофэ пэIудзыгъэ псэупIэхэм адэс цIыфхэм япсауныгъэ зэрауплъэ­кIурэм ныбжьыкIэхэр лъыплъагъэх ыкIи хэлэжьагъэх. Коронавирусыр къызэ­утэкIыгъэхэм диспансеризацие арагъэ­кIугъ.

Адыгэ Республикэм гъэсэныгъэмрэ шIэныгъэмрэкIэ и Министерствэ къызэритыгъэмкIэ, ипсауныгъэ изытет зэзыгъашIэ зышIоигъо пстэуми лъыр ахащыгъ, шъоущыгъоу ыкIи холестеринэу ахэлъыр зыфэдизыр зэрагъэшIагъ. Ковидыр къыомыутэкIыным пае шIэгъэн фаер цIыфхэм къафаIотагъ, япсауныгъэ ренэу лъыплъэнхэ зэрэфаер агурагъэ­Iуагъ.

Шъаукъо Аслъангуащ.