Пандемием къыхэкIэу кIэлэцIыкIухэм ягъэмэфэ зыгъэпсэфыгъо зэрагъакIорэм щыкIагъэхэр фэхъугъагъэх. Адыгеим и ЛIышъхьэ ар къыдилъытэзэ, цIыф жъугъэхэр зыхэлэжьэхэрэ Iофтхьабзэхэр нахь гъэшIэгъонэу мыгъэ зэхащэхэзэ ашIынэу цIыфхэм къяджагъ.

«Зызыгъэпсэфырэ ыкIи зипсауныгъэ зыгъэпытэрэ кIэлэцIыкIухэу гъэмэфэ лагерьхэм къякIолIэщтхэм экскурсиехэр, концертхэр, зэнэ­къо­къухэр ящыкIагъэх. Ащ пае сабыйхэм язы­гъэпсэфыгъо лъэхъан зэхэзыщэрэ министерствэхэм программэ гъэшIэгъонхэр афызэхагъэуцонхэу унашъо афэсшIыгъ. Ащ дакIоу санитарнэ-эпидемиологическэ шапхъэхэр амы­укъонхэм, зэпахырэ уз­хэм ащаухъумэнхэм ана­Iэ атырагъэтын фаеу зэрэщытыр къагурыIоу сэлъытэ. КIэлэцIыкIу­хэм ашхыхэрэр япсауныгъэкIэ зишIуагъэ къэ­кIощт шхын къабзэхэр ары, — къыIуагъ ащ.

Мыгъэ Адыгеим иорганизациехэм зэзэгъыныгъэу адашIыгъэм­кIэ, кIэлэцIыкIу 1957-мэ лагерьхэм защагъэпсэфын алъэ­кIыщт. Ащ фэшъхьафэу лагерь 91-рэ еджапIэхэм къащызэIуахыщт, ахэм сабый 4884-рэ къякIолIэщт.

ЗэкIэмкIи гъэмэфэ гъэпсэфыгъо лъэхъаным республикэм щыпсэурэ кIэлэцIыкIу мини 6,8-мэ загъэпсэфыщт. Ар Iофтхьэбзэ ин, сабыйхэм яфэIо-фашIэхэм апэIуагъэхьанэу сомэ миллион 71-рэ къафатIупщыщт.

Шъаукъо Аслъангуащ.