«Зэкъошныгъ» Мыекъуапэ — «Спартак» Налщык — 1:0 (0:0). Мэлылъфэгъум и 23-м АР-м истадион щызэдешIагъэх. Зезыщагъэхэр: Привалов, Ежак (Шъачэ), Габадков (Владикавказ).

«Зэкъошныгъ»: Хьачыр, КIышъэ, Далый, Кириленко, Богатырев, Макоев (Васильев — 70), Оразаев (Гъыщ, 70), Пекъу, КIурачын (Iащэ, 40), Къонэ, Делэкъу (Крылов, 80). Къэлапчъэм Iэгуаор дэзыдзагъэр Iащэ Анзор — 52, пенальтикIэ.

Тлупов, пенальтир дидзагъэп — 26, «Спартак».

ЗэIукIэгъум текIоныгъэр къыщыдэзыхыщтыр язэрэмыгъашIэу футбол клубхэр зэнэкъокъугъэх.

Я 26-рэ такъикъым «Зэкъошныгъэм» иухъумакIоу И. Оразаевым шапхъэхэр ыукъуагъэх, Тлуповым дысэу пэуцугъ. Судьям пенальтир ыгъэунэфыгъ. Тлуповыр «Зэкъошныгъэм» икъэлапчъэ зы­даом, Iэгуаор къэлэпчъэпкъым ыб­гъукIэ быбыгъэ, пчъагъэр 0:0-у къэнэжьыгъ.

ЕшIакIохэр гупчэм имызакъоу, къэлапчъэм дэжь пхъашэу щызэнэкъокъущтыгъэх. Я 50-рэ такъикъым «Спартак» иешIакIоу Белоусовым шапхъэхэр ыукъуагъэхэу судьям унашъо ышIыгъ. Пенальтир А. Iащэм дэгъоу ыгъэ­цэкIагъ, пчъагъэр 1:0 хъугъэ.

«Спартак» хъагъэм Iэгуаор ридзэн имурадэу бэрэ ыпэкIэ илъыщтыгъ. Я 82-рэ такъикъым «Зэкъошныгъэм» иешIакIоу Д. Кры­ловыр судьям ешIапIэм ригъэ­кIыгъ шапхъэхэр зэриукъуагъэхэм фэшI.

Къэбэртэе-Бэлъкъарым ифутбол клуб иешIакIохэр «Зэкъошныгъэм» икъэлапчъэ благъэу бэрэ къекIугъэх, къэлапчъэм къыдэуагъэх, угловоир заулэрэ къатыгъ.

ЕшIэгъу уахътэр заухым, такъи­къи 7 судьям къафыхигъэхъуагъ. А. Iащэр, А. Къонэр загъорэ апэкIэ илъыщтыгъэх, ау хъагъэм Iэгуаор радзэнэу чIыпIэ ифагъэхэп. Ти­ухъу­макIохэр, анахьэу къэлэпчъэ­Iутэу Хьачыр Тамерлан цыхьэшIэгъоу ешIагъэх. IэпэIэсэныгъэ дэгъу къыгъэлъагъозэ, Тамерлан заулэрэ Iэгуаом кIуапIэ ритыгъэп.

ЕплъыкIэхэр

Зэкъош республикэхэм яклубхэм язэнэкъокъу еплъыгъэх Урысыем и Къэралыгъо Думэ идепута­тэу Хьасанэкъо Мурат, Адыгэ Республикэм физкультурэмкIэ ыкIи спортымкIэ и Комитет итхьа­матэу Дэгужъые Мурат, ащ игуа­дзэу Андрей Бородиныр, нэмыкI спорт IофышIэхэр.

— «Зэкъошныгъэм» иешIакIэ хегъахъо. Налщык икоманди дэгъоу ешIагъ. ЗэIукIэгъур зыхьыщтыр къэшIэгъуаеу зэрэщытыгъэм тигуапэу теплъыгъ, — къытиIуагъ Хьасанэкъо Мурат.

ЕшIэгъухэр

Урысыем футболымкIэ изэнэ­къокъоу ятIонэрэ купым щыкIорэм я 27-рэ зэIукIэгъухэр щызэхащагъэх. КIэуххэр зэтэгъапшэх.

«ТIуапсэ» — «Динамо» Ст — 2:1, «Анжи» — «Чайка» — 3:6, «Кубань-Холдинг» — «Легион» — 1:0, «Форте» — «Биолог» — 2:2, «Алания-2» — «Мэщыкъу» — 1:1, «Динамо» Мх — «Ессентуки» — 5:0, «Ротор-2» — «Черноморец» — 0:5.

ЧIыпIэхэр

1. СКА — 59 2. «Динамо» Мх — 59 3. «Чайка» — 54 4. «Форте» — 48 5. «Кубань-Х.» — 45 6. «Черноморец» — 44 7. «Анжи» — 40 8. «Легион» — 33 9. «Биолог» — 32 10. «ТIуапсэ» — 32 11. «Спартак» — 30 12. «Зэкъошныгъ» — 27 13. «Мэщыкъу» — 26 14. «Динамо» Ст — 25 15. «Ротор-2» — 17 16. «Алания-2» — 11 17. «Ессентуки» — 10. Я 28-рэ зэIукIэ­гъухэр 29.04 «Ессентуки» — «Ротор-2» 30.04 «Динамо» Ст — СКА «Биолог» — «Динамо» Мх «Легион» — «Форте» «Мэщыкъу» — «Кубань-Х.» «Спартак» — «Алания-2» «Чайка» — «Зэкъошныгъ» «Черноморец» — «ТIуапсэ».