Адыгэ Республикэм и ЛIышъхьэу КъумпIыл Мурат тыгъуасэ Мыекъуапэрэ Адыгеимрэ яархиепископэу Тихон АР-м и Правительствэ и Унэ зэIукIэгъу щыдыриIагъ.

Ащ хэлэжьагъэх Адыгэ Рес­публикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец, Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.

Адыгеим и ЛIышъхьэ архиепископымрэ православнэхэмрэ Пасхэм пае къафэгушIуагъ, псауныгъэрэ щыIэкIэшIурэ яIэнэу афиIуагъ. Анахьэу анаIэ зытырагъэтыгъэр мэфэкI Iоф­тхьабзэхэм ыкIи диным епхыгъэ фэIо-фашIэхэм ялъэхъан щынэгъончъэу щытыныр ары.

Дин зэфэшъхьафхэр зылэ­жьыхэрэр зэгурыIонхэм, дин организациехэм яIофшIэн тэрэзэу зэхэщэгъэным, цIыфхэр шэпхъэ дахэхэм арыгъозэнхэм япхыгъэ Iофыгъохэм атегущыIагъэх.

«Республикэм исхэм зэгурыIоныгъэ-зэзэгъыныгъэ азыфагу илъыным мэхьанэшхо етэты. Мыекъопэ, Адыгэ епархиемрэ быслъымэнхэм я ДиндэлэжьапIэрэ зэгъу­сэхэу Iофыгъоу къэуцу­хэрэр зэшIуахынхэмкIэ зэгурыIоныгъэм мэхьа­нэшхо иI. ЧIыпIэ къин цIыфхэр зыщифэхэрэ лъэхъаным IэпыIэгъу ятыгъэнымкIэ ащ фэдэ IофшIэнэу зэдегъэштэныгъэ зыхэлъым обществэм игъэпытэнкIи мэхьанэ иIэу щыт. Шэп­хъэ дахэхэм такъыпкъы­рыкIыныр ары ыпэкIэ тылъыкIотэным лъапсэ фэхъущтыр», — къы­Iуагъ КъумпIыл Мурат.

Чылысхэм къапэIулъ чIыпIэхэр зэтегъэпсыхьэгъэнхэм ыкIи дин фэIо-фашIэхэм япхыгъэ унэхэр шIыгъэнхэм афэгъэхьыгъэ Iофыгъохэр хэушъхьафыкIыгъэу мы зэIукIэгъум къыщаIэтыгъэх. Диныр зылэжьыхэрэм къыра­хьы­жьэрэ IофтхьэбзэшIу­хэмкIэ IэпыIэгъу зэрафэхъухэ­рэм пае Тихон республикэм ипащэхэм зэрафэразэр къыIуагъ.

Свято-Успенскэ кафедральнэ соборым ишIын иIоф ары анахьэу къыхагъэщыгъэр. Унашъхьэр тыралъхьэгъах, унэшъхьэ шыгум (куполым) кIэух IофшIэнхэр даублагъэх, нэужым оды­джыныр агъэуцущт. Джащ фэдэу псэупIэхэу Дондуковскэмрэ Безводнэмрэ чылысыкIэхэр ащашIыгъэх. Ащ нэмыкIэу къутырэу Гавердовскэм дэт чылысым екIолIэрэ гъогур бэмышIэу асфальткIэ агъэпкIагъ. Адыгеим и ЛIышъхьэ къызэриIуагъэмкIэ, проектхэмкIэ ишIуагъэ аригъэ­кIыным фэхьазыр, хабзэм икъу­лыкъухэмрэ динхэр Адыгеим щызылэжьыхэрэм пэщэныгъэ адызезыхьэхэрэмрэ республи­кэм зэгурыIоныгъэ-зэзэгъыныгъэ илъыным тапэкIи зэрэфэлэжьэщтхэм мэхьанэшхо иI.

АР-м и ЛIышъхьэ ипресс-къулыкъу