Хэгъэгу зэошхом ТекIоныгъэр къызщыдахыгъэр илъэс 77-рэ зэрэ­хъурэм ипэгъокIэу ащ хэлэжьагъэхэмрэ сэкъатныгъэ хэзыхыгъэхэмрэ ахъщэ тынхэр УФ-м ПенсиехэмкIэ ифонд афитIупщыгъ.

Шъугу къэдгъэкIыжьын, УФ-м и Президентэу Владимир Путиныр 2019-рэ илъэсым мэлылъфэгъум и 24-м зыкIэтхэгъэ унашъоу ТекIоныгъэм и Мафэ ипэгъокIэу хэушъхьафыкIыгъэ цIыф купхэм илъэс къэс ахъщэ тынхэр афэгъэкIогъэнхэм фэгъэ­хьыгъэм диштэу фондым ахэр афетIупщых.

Пенсиехэмрэ социальнэ ахъщэ тынхэмрэ ягъусэу мэлы­лъфэгъу мазэм ахэр афагъэхьы. Ветеранхэм япенсиехэр къызэраIэкIахьэрэ шIыкIэм елъытыгъ пIалъэу ахъщэ тыныр зэрафэкIощтыри. Урысыем ипочтэ е пенсиехэр аIэкIэзгъахьэрэ Гупчэм яфэIо-фашIэхэр зыгъэфедэхэрэм мэлылъфэгъу мазэмкIэ пенсиеу къафатIупщыгъэм игъусэу жъоныгъокIэ мазэм и 9-м ипэгъокI ахъщэ тынри аратыщт. Банкым счет щызиIэу, ащкIэ пенсиер къызIэкIахьэхэрэм мэлылъфэ­гъум и 7-м пенсием игъусэу ахъщэ тынри афагъэхьыгъ.

ТекIоныгъэм и Мафэ ипэгъо­кIэу ахъщэ тыныр фагъэхьынэу Адыгеим къинэжьыгъэр нэбгырэ 57-рэ мэхъу. Ахэм ащыщэу нэбгыри 10-мэ заом сэкъатныгъэ хахыгъ, 47-р хэлэжьагъэх.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.