2022-рэ илъэсым мэлылъфэгъум и 24-м къыщегъэжьагъэу и 30-м нэс иммунизацием и Европейскэ тхьамафэ Адыгеим щыкIощт. Ащ фэгъэхьыгъэ пресс-конференцие Роспотребнадзорым и ГъэIорышIапIэу АР-м щыIэм щыкIуагъ.

Iофтхьабзэм хэлэжьагъэх АР-м псауныгъэр къэухъумэгъэ­нымкIэ и Министерствэ иштат хэмыт эпидемиологэу Шъэожъ Альбинэ, Роспотребнадзорым эпидемиологием изытет лъыплъэгъэнымкIэ отделым ипащэ иIэнатIэ зыгъэцэкIэрэ Гурген Авакян, мыщ игуадзэу Iэшъынэ Нэфсэт, общественнэ псауныгъэмкIэ ыкIи медицинэ профилактикэмкIэ Адыгэ республикэ гупчэм иотдел ипащэу Диана Макрищевар.

Гурген Авакян пэублэ псалъэ къышIызэ, илъэс къэс, гъэтхапэм иммунизацием и Европейскэ тхьамафэу зэхащэрэр зэпа­хырэ узхэр цIыфым къемыутэ­кIынхэм пае халъхьэрэ уцым (вакцинэм) мэхьанэшхо зэриIэр къэралыгъохэм ыкIи ахэм ащыпсэухэрэм зэлъягъэшIэгъэным зэрэфэIорышIэрэр хигъэ­унэфыкIыгъ. Илъэс 200-м ехъугъ иммунизацием цIыфым ищыIэныгъэ щынэгъончъэ зишIыгъэр.

— Зэпахырэ узхэу дифтерия, столбняк, шъогъазэ, полиомиелит, грипп, гепатит В зыфэпIощтхэу ыкIи нэмыкI узхэу цIыфыр зэрылIыкIын е сэкъатныгъэ зыхихын ылъэкIыщтхэр иммунизацием ишIуагъэкIэ щыгъэзыягъэхэ мэхъу. А вакцинэхэм джы кIэу къахэхьагъ COVID-19-м пэуцужьырэ МРНК-вакцинэхэри. Иммунизациер пшъэ­рылъ шъхьаIэхэм захэпхыкIэ зэпахырэ узхэм ащыщыбэхэм заушъомбгъун алъэкIыщтышъ, ащ имэхьанэ икъоу цIыфхэм алъыдгъэIэсын фае, — къы­Iуагъ Гурген Авакян.

ЗэхэщакIохэм къызэрэхагъэ­щыгъэмкIэ, нэмыкI къэралыгъо­хэм къарыкIыжьыхэрэм зэпахырэ узхэр къырамыхьанхэм анаIэ тырагъэтын фае. Анахьэу ЛНР-р ыкIи ДНР-р къэзыбгынагъэхэм игъом ящыкIэгъэ вакцинэхэр ахэлъхьэгъэнхэ зэрэфаер къа­Iуагъ. Гъэтхэпэ мазэм ыкIэм зэпахырэ узэу шъогъазэм лъэшэу зыкъызыщиIэтыгъэхэм Таджикистан ащыщ, мыщ хъугъэ-шIэгъэ 90-рэ щатхыгъ. Мы узыр шIэхэу зызыушъомбгъу­хэрэм ащыщ.

Эпидемиологэу Шъэожъ Альбинэ цIыфхэм зафегъазэ, ящыкIэгъэ вакцинэхэр игъом зыхарагъэлъхьанэу. Сыда пIомэ, а зы амалыр ары пкъынэ-лынэр зэпахырэ узхэм икъоу ащызыухъумэрэр. Лъэпкъ мэфэпчъым хэхьэрэ вакцинэхэр кIэлэцIыкIухэм игъом ахарагъэлъхьаныр пшъэрылъ шъхьаIэхэм ащыщ. Коронавирусым пэуцужьырэ вакцинэм ихэлъхьани зыщыдгъэ­гъупшэ хъущтэп. Узым игумэкIыгъо щыгъэзыягъэ охъуфэ, мэзих тешIэ къэс цIыфым ре­вак­цинацие аригъэшIын фае.

— Иммуннэ-биологическэ препаратхэр икъоу республикэм IэкIэлъых, зыми тыщыкIэрэп. Поликлиникэхэм вакцинэхэр ащыIэх, — къыIуагъ Шъэожъ Альбинэ. — Джащ фэдэу къыхэзгъэхъожьымэ сшIоигъу, 2021-рэ илъэсым пэшIорыгъэшъ прививкэхэм я Лъэпкъ мэфэпчъ зэхъо­кIыныгъэу фэхъугъэхэм ащыщ полиомелитым пэуцужьырэ при­вивкэм ихэлъхьан.

Медицинэ профилактикэмкIэ гупчэм иотдел ипащэу Диана Макрищевам гущыIэр лъигъэкIотагъ. Ащ къызэриIуагъэмкIэ, иммуннопрофилактикэм и Лъэпкъ мэфэпчъ, ащ хэхьэрэ прививкэхэр ашIэмэ цIыфхэм яупчIыгъэх. Нэбгырэ 1500-м ащыщэу ныбжь зиIэ нэбгырэ 81-мэ, апшъэрэ классхэм арыс кIэлэеджэкIуи 100-мэ ар ашIэрэп. Жъэгъэузым пэуцужьырэ прививкэр — процент 83-мэ, диф­терия, коклюш, столбнякыр — процент 77-мэ, полиомиелитыр — процент 76-мэ, гриппыр — процент 45-мэ ахэлъ. Мы пчъа­гъэхэр ыпэрэ илъэсхэм нахьыбагъ, коронавирусым ипандемие илъэхъан иммунизацием имэхьанэ къизыIотыкIырэ Iофтхьабзэхэр икъоу гупчэм зэхищэнхэ зэримылъэкIыгъэм ар рапхы.

— Мазэр екIыфэ вакцинэм шIуагъэ зэрэпылъыр ыкIи ащ ущыщынэнэу зэрэщымытыр цIыфхэм агурыдгъэIоным тыпы­лъыщт, — еIо Диана Макрищевам. — Иммунизацием и Евро­пейскэ тхьамафэ фэгъэхьыгъэ Iофтхьабзэхэр еджапIэхэм ащы­зэхэтщэщтых, кIэлэеджакIо­хэм зэдэгущыIэгъухэр адэт— шIыщтых, тестхэр ядгъэкIущтых. Ащ нэмыкIэу IэзэпIэ учреждениехэм пэшIорыгъэшъ Iофтхьабзэхэр ащыредгъэкIокIыщтых. Псауныгъэм икъэухъумэнкIэ иммуннопрофилактикэм ишIогъэшхо къызэрыкIорэр ны-тыхэм агурыдгъэIоныр пшъэрылъ шъхьа­Iэу тиIэхэм ащыщ.

Iофтхьабзэм икIэух Роспотребнадзорым иотдел ипащэ игуадзэу Iэшъынэ Нэфсэт къэгущыIагъ. Ащ къызэриIуагъэмкIэ, пневмококковэ, гемофильнэ инфекциер, жъэгъэузыр, дифтериер, коклюшыр, столбнякыр къямыутэлIэнхэмкIэ вакцинэхэр зыхалъхьан фае. Роспотребнадзорым Адыгэ РеспубликэмкIэ и ГъэIорышIапIэ испециалистхэм шIоигъоныгъэ зиIэ цIыфхэм а пстэур агурагъэIощт, нэмыкI уп­чIэу зыгъэгумэкIыхэрэм яджэуапхэр агъотынхэм пае «линие плъырым» ителефонхэу 8(8772)56-04-06, 52-74-33, 57-11-84 атеонхэ алъэкIыщт.

Iэшъынэ Сусан.