АР-м и Къэралыгъо Совет – Хасэм ияблэнэрэ зэIугъэкIэгъу зичэзыу зэхэсыгъоу тыгъуасэ иIагъэм цIыфхэм яфитыныгъэхэр къэухъумэгъэнхэмкIэ АР-м и Уполномоченнэ, УплъэкIокIо-лъытэкIо палатэм блэкIыгъэ илъэсым Iофэу ашIагъэр щызэфахьысыжьыгъ, лъэныкъо зэфэшъхьафыбэм афэгъэхьыгъэ законхэр, законопроектхэр щаштагъэх.

Iофтхьабзэм АР-м иминистрэхэм я Кабинет хэтхэр, федеральнэ ыкIи шъо­лъыр къулыкъухэм япащэхэр, нэмыкIхэр хэлэжьагъэх, Парламентым и Тхьаматэу Владимир Нарожнэм ар зэрищагъ.

АР-м и ЛIышъхьэ, Правительствэр, депутатхэр кIэщакIо зыфэхъугъэ законопроектхэм атегущыIагъэх, апэрэ ыкIи ятIонэрэ еджэгъухэмкIэ аштагъэх. Къэралыгъо Советым – Хасэм ирегламент, къэралыгъо къулыкъум, бжьэхъуным, зэпахырэ узхэм замыушъомбгъуным пае зэшIохыгъэн фаехэм, лъэпкъ художественнэ промыслэм, мэкъумэщ хъызмэтым ичIыгухэм лэжьыгъэшIу къатыным, ошIэ-дэмышIэ Iофхэм тхьамыкIагъоу къыздахьыхэрэм цIыфхэр ащыухъумэгъэнхэм, нэмыкIыбэм ахэр афэгъэ­хьыгъэх.

Джащ фэдэу Оксана Бельдиновар Мыекъуапэ ихьыкум участкэу N 2-м, Дэкъумэ Русыет — N 7-м яхьыкумышIхэу гъэнэфэгъэнхэм тегущыIэхи, дырагъэштагъ.

ЦIыфхэм яфитыныгъэхэр къэухъумэгъэнхэмкIэ АР-м и Уполномоченнэу Анатолий Осокиным идоклад къызэрэщиIуагъэмкIэ, икIыгъэ илъэсым аппаратым цIыфхэр зыщыригъэблэгъагъэхэм нэбгыри 179-рэ пстэумкIи къекIолIагъ, нэбгырэ 29-рэ «линие плъырым» къытеуагъ, зэкIэмкIи нэбгырэ 200-м ехъумэ яупчIэхэм аппаратым иIофышIэхэм джэуапхэр аратыжьыгъ.

Яфитыныгъэхэр зэраукъохэрэм епхыгъэ тхьаусыхэ зиIэу е игумэкIыгъо зэхифыным пае IэпыIэгъу ищыкIагъэу нэбгырэ 364-мэ Уполномоченнэм зыкъыфагъэзагъ. Анатолий Осокиным къызэрэхигъэщыгъэмкIэ, цIыфхэм Iофыгъоу къырахьылIагъэхэм ядэгъэзыжьын депутатхэм ащыщыбэ хэлэжьагъ.

АР-м и УплъэкIокIо-лъытэкIо палатэ 2021-рэ илъэсым гъогогъуи 9-рэ уп­лъэкIунхэр зэхищагъэх. ПстэумкIи псэолъэ 72-рэ ауплъэкIугъ. АР-м и ЛIы­шъхьэ пшъэрылъ къафишIыгъэу ащ фэдэ Iофтхьабзэ зэхащэуи къыхэкIыгъ. ГущыIэм пае, республикэм ипащэ иунашъокIэ ублэпIэ классхэм арыс кIэлэ­еджакIохэм шхын стыр зэраIакIагъа­хьэрэр ауплъэкIугъ.

Лъэпкъ проектхэм къадыхэлъытагъэ­хэр гъэцэкIагъэ зэрэхъурэми палатэр лъэплъэу ары ипащэ къызэриIуагъэр. Ахэр зэкIэ икъоу ыкIи игъом агъэцакIэх, мылъкоу къадыхэлъытагъэри зищыкIагъэм пэIуагъахьэ.

Адыгеим и Парламент идепутатхэр УФ-м игражданствэ фэгъэхьыгъэ хэбзэгъэуцугъэм зэхъокIыныгъэхэр фэшIыгъэнхэм кIэщакIо фэхъугъэхэу ащ ипроект УФ-м и Къэралыгъо Думэ фагъэхьыгъ. КIэлэцIыкIур IэкIыб къэрал къыщыхъугъэу, ау янэ е ятэ Урысыем ицIыфмэ, сабыим тихэгъэгу игражданствэ зэрэратыщтыр нахь къызэрыкIо шIыгъэныр игъоу ащ къыщеIо.

Джащ фэдэу депутатхэу ШъэоцIыкIу Схьатбыйрэ Любовь Ананниковамрэ зекIонымкIэ, экологиемкIэ ыкIи чIы­опсым ибыиныгъэхэр гъэфедэгъэнхэмкIэ комитетым ипащэ игуадзэу агъэнэфагъэх, НыбжьыкIэ парламентэу АР-м и Къэралыгъо Совет – Хасэм щызэхащагъэм хэтыщтхэми атегущыIэхи, адырагъэштагъ.

ХЪУТ Нэфсэт.