Республикэм и Лъэпкъ театрэу Цэй Ибрахьимэ ыцIэ зыхьырэм «Къэ­зыгъэ­зэ­жьырэр Тхьэм ештэжьы» зыфиIорэ спектаклэр къыщагъэлъэгъуагъ.

Абхъазым, Адыгэ Республикэм искусствэхэмкIэ язаслуженнэ IофышIэшхоу Нэгъой Инвер пье­сэр ытхыгъ ыкIи театрэм щигъэ­уцугъ.

ЯныбжьыкIэгъум шIу зэрэлъэгъугъэхэ Батмызэрэ Маретрэ зэшIокIодыхи, илъэс 20 тешIагъэу къэзэрэгъотыжьыгъэх.

ЯщыIэныгъэ зэхъокIыныгъэхэр фэхъугъэх. Марет кIэлэегъадж, артист хъущтхэр регъаджэх. Батмызэ бизнесым хэхьагъ, мылъку зэригъэгъотыгъ. НэбгыритIуми янэIуасэхэр къащэтхъух, ау унагъо яIэпышъ, щыIэныгъэм упчIабэ къыщэтэджы.

Марет ироль къэзышIырэр артисткэу КIэмэщ Разет. Артист сэнэхьатым зыфэзыгъэсэрэ пшъа­шъэу Дианэ ироль фэгъэзагъэр Тхьэкъуахъо Мэрджанэт. КIэлэегъаджэмрэ студентымрэ язэфыщытыкIэхэр режиссерым гъэшIэгъонэу ыгъэпсыгъэх. ШIу зэрэлъэ­гъухэрэ Маретрэ Батмызэрэ къэзэрэгъотыжьынхэм фэшI Дианэ ишIогъэшхо къегъакIо.

Батмызэ ыIощтыри, ышIэщтыри къыгурымыIохэу уахътэ къызе­кIум, иныбджэгъухэр ары апэу къыкъоуцуагъэхэр, IэпыIэгъу къы­фэхъугъэхэр. Артистхэу Ахъмэт Артуррэ Болэкъо Адамрэ ярольхэмкIэ щыIэныгъэм ухащэ, урагъэ­гупшысэ. Батмызэ ышыпхъоу Саныет, артисткэр Хьэлащтэ Саны­ет, шIу зэрэлъэгъущтыгъэхэр зэIукIэжьынхэм екIурэ гъогур къыгъотыным пылъ. Зэш-зэшыпхъу­хэр зэрэзэфыщытхэри режиссерым зэхэугуфыкIыгъэу къыхегъэщы.

Дэмэлые Казбек, УдыкIэко Ислъам, Тхьэкъуахъо Мэрджанэт ныбжьыкIэхэм ярольхэр къашIызэ, Iахьылхэм, ныбджэгъухэм, кIэлэегъаджэхэм ящыIэныгъэ щыщ пы­чыгъохэр дэгъоу къагъэлъагъох.

Режиссерыр цIыф зэфыщытыкIэхэм гукIэ зэралъыIэсырэр артистхэм ярольхэм къащызэIуа­хы. СурэтышIэу Сихъу Рэмэзан иIофшIагъэ, артистхэр зэрэфэпагъэхэр, фэшъхьафхэм тынаIэ атетыдзагъ. ЛIыIужъу Къэлэшъао иорэдхэр къэгъэлъэгъоным дештэх. ШIулъэгъу къабзэм гур къы­фаIэты. Арэу щытми, гущыIэхэр зэхэшIыкIыгъуаехэ загъорэ зэрэ­хъухэрэм уегъэгумэкIы. Дискым тетхагъэм уедэIузэ, псэ зыпыт гущыIэхэр икъоу къыплъымыIэсыхэу къыхэкIы.

Адыгэмэ зэраIоу, къэзыгъэзэжьырэр Тхьэм ештэжьы. Батмызэ къыгъэзэжьи, ишIулъэгъу къыгъотыжьыгъ.

Къэгъэлъэгъоным урегъэгуп­шысэ, щыIэныгъэр нахьышIоу къыбгурегъаIо. «ЯныбжьыкIэгъум зэгурымыIуагъэхэу нэбгырэ тхьапша зэшIокIодыгъэр?» зыфэпIощт упчIэр бэрэ гум щэчэрэгъу. Хэта бгъэмысэщтыр? Марет ныом фэдэу зифапи, Батмызэ дэжь кIуагъэ. КъыраIорэр дэеу зэхихырэм фэдэу зыкъишIызэ, Батмызэ дэгущыIагъ. Ащ фэдэ зекIуакIэ зэкIэ бзылъфыгъэхэм къызыхагъэ­фэн алъэкIыщтми тшIэрэп. Къа­тIомэ тшIоигъор шIулъэгъум икъэухъумэн къызэрыкIоу зэрэщымытыр ары.

Режиссерым, артистхэм тафэраз. ШIулъэгъу орэдхэм гур зэлъакIу. ЛIэуж зэфэшъхьафхэм язэпхыныгъэхэр шIу зэрэлъэгъугъэхэм агъэпытэзэ, щыIэныгъэм къырыкIон ылъэкIыщтыр къэшIэгъуае мэхъу. Джэуапыр зэбгъэшIэн уимурадэу театрэм уанэIу фэогъазэ, зичэзыу къэгъэлъэгъон­хэм уяплъы пшIоигъоу мэкъэгъэ­Iухэм защыогъэгъуазэ…

«Шыу мафэм» зыфэтэгъазэ

Урысыем итхакIохэм я Союз хэтэу Дэрбэ Тимур ипьесэ техыгъэу «Шыу маф» зыфиIорэ спектаклэр мэлылъфэгъум и 22-м Адыгэ Республикэм и Лъэпкъ театрэу И. Цэим ыцIэ зыхьырэм къыщагъэлъэгъощт. Режиссерэу, Адыгэ Республикэм искусствэхэмкIэ изаслуженнэ IофышIэшхоу ЕмкIуж Андзор къытиIуагъ «Шыу мафэм» игъэуцун игуапэу Iоф зэрэдишIагъэр. Тарихъым, лъэпкъ шэн-хабзэхэм, шIулъэгъу къабзэм икъэухъумэн афэгъэхьыгъэ къэгъэ­лъэгъоным зыцIэ къетIогъэ артистхэр хэлажьэх, роль шъхьа­Iэхэр къыщашIых. ШIулъэгъур гум къыщежьэ, псэ къыпэкIэ, щыIэныгъэм чIыпIэ къыщегъоты. Зэо-банэхэм ахэтхэу адыгэ кIалэмрэ нэмыц пшъашъэм­рэ зэIукIэхи шIулъэгъур къызэраухъумагъэр «Шыу мафэм» щытлъэгъущт.