Урысые Федерацием и Президентэу Владимир Путиным тыгъуасэ платформэу «Россия — страна возможностей» зыфиIорэм и ЛъыплъэкIо совет иящэнэрэ зэIугъэкIэгъу зэрищагъ. Зэнэкъокъоу «Твой ход» зыфиIорэм текIоныгъэ къыщыдэзыхыгъэу, Мыекъопэ къэралыгъо технологическэ университетым иятIонэрэ курс иеджакIоу Павел Дорошенкэр ащ хэлэжьагъ.

2021-рэ илъэсым зигугъу къэтшIыгъэ зэнэкъокъум хэлажьэзэ, кIэух уцугъом ащ ыгу къыщыкIыгъагъ «Студ.место» зыфиIорэ проектыр. Апшъэрэ еджапIэм щеджэхэрэр зэзыщэ­лIэщт чIыпIэхэм язэхэщэн ыкIи еджэкIо анахь чанхэм апае стипендиехэм ягъэнэфэн ащ къыдыхелъытэ. Мы Iофыгъохэм зэIукIэгъум щахэплъагъ Урысыем и Президентэу, автономнэ мысатыу организациеу «Россия – страна возможностей» зыфиIорэм и ЛъыплъэкIо совет и Тхьаматэу Владимир Путиныр.

Къэралыгъом иныбжьыкIэхэр анахьэу зыщызэхэугъоягъэхэр апшъэрэ еджапIэхэр арых. Ахэм амалэу яIэхэр егъэджэн процессым хэмыхьэрэ уахътэми къащагъэлъэгъошъущтых «Студ.место» зыфиIорэ чIыпIэхэр апшъэрэ еджапIэхэм ащызэхащэхэмэ. Джащ фэдэу ахэм ащызэхэугъоегъэщтых проектхэу ныбжьыкIэ IофхэмкIэ федеральнэ агентствэм, гъэсэныгъэмкIэ Министерствэм, Урысые обществэу «Знание» ыкIи «Россия — страна возможностей» зыфиIохэрэм къагъэхьазырыхэрэр, Урысые зэнэкъо­къухэу «Твой ход» ыкIи «Большая перемена» зыфи­Iохэрэм къыдалъытэхэрэр.

Проектыр зытегъэ­псы­хьагъэр къэралыгъом иапшъэрэ еджапIэ пэпчъ чIыпIэхэу студент чанхэр зыщызэдэлэжьэшъущтхэр, амал ыкIи зэнэкъокъу зэфэшъхьафэу щыIэхэр зыщызэрагъэшIэшъущтхэр, анахьэу къякIущт ыкIи къашъ­хьапэщт лъэныкъохэр къызщыхахышъущтхэр, джащ фэдэу япроектхэмрэ ягукъэкIхэмрэ зыщыпхыращышъущтхэр къащызэIухыгъэнхэр ары. IофшIапIэ языгъэгъотыщтхэм аIукIэгъэнымкIэ ыкIи зэныбджэгъухэм язэIукIапIэ хъунымкIэ фэдэ чIыпIэхэр амалышIущтых.

«Джырэ уахътэм бэмэ къа­шIошIы студентым хэхъоныгъэ­хэр ышIынхэм пае къэлэ шъхьа­Iэм дэсын ыкIи щеджэн фаеу. Сэнаущыгъэу аIэкIэлъым икъызэIухынкIэ чIыпIакIэхэм къагъэ­лъэгъощт Урысыер лъэкIэу щы­Iэхэм зэрякъэралыгъор, тикъэралышхо ичIыпIэ зэфэ­шъхьафыбэмэ адэсхэми а лъэ­кIыр зэряIэр», — къыIуагъ Павел Дорошенкэм.

Апшъэрэ еджапIэхэм студентхэм ясообществэхэу «Студ.место» зыфиIохэрэр ащызэхэщэгъэнхэмкIэ гукъэкIым Владимир Путиным къыдыригъашти, къыIуагъ:

«ГукъэкI дэгъу. Щэч хэмы­лъэу студентхэм ящыIакIэ, яегъэджэн, язэхэщэн хэхъоныгъэ егъэшIыгъэн фае, уигу­къэкI къэкIощт уахътэм дештэ. Кам­пусыкIэу (университет къэлэжъыеу) тшIыхэрэми ар къа­щыдэтэлъытэ, хэхъоны­гъэм, зэдэлэжьэныгъэм, творческэ гухэлъхэм япхырыщын зыщызэшIуахышъущт чIыпIэ хъунхэу. Ахэм ащызэхатщэ­хэрэр ыпэкIэ агъэпсыгъэгъэ чIыпIэхэм щапхырыпщышъуныр нахь къин, ау ащи уфэкIон фае».

Нэужым Владимир Путиным гущыIэ ритыгъ УФ-м шIэныгъэм­кIэ ыкIи апшъэрэ гъэсэныгъэмкIэ иминистрэу, автономнэ мысатыу организациеу «Россия – страна возможностей» зыфи­Iорэм и ЛъыплъэкIо совет хэтэу Валерий Фальковым, Павел игукъэкIкIэ гупшысэу иIэхэр къыриIотыкIынхэу.

«Ащ детэгъаштэ, зыщеджэхэрэ ыкIи зыщыпсэухэрэ корпусхэм квадратнэ метрэ 50-м къыщегъэжьагъэу 500-м нэс зиинэгъэ унэхэр къафыхэдгъэкIынхэ тлъэкIыщт, ищыкIагъэр аIэкIэдгъэхьашъущт. Платформэм къы­хиубытэрэ зэнэкъокъухэм, IэпыIэгъоу щыIэхэм афэгъэхьыгъэ къэбар пстэури фэдэ чIыпIэхэм ащызэхэугъоегъэщт, студент пэпчъ ахэм якIолIэнышъ, ищыкIэгъэ къэбарыр зэригъэгъотышъущт. НыбжьыкIэ IофхэмкIэ Федеральнэ агентствэмрэ платформэу «Россия – страна возможностей» зыфиIорэмрэ мы Iофыгъом епхыгъэу зафэдгъэзэгъахэу тырэгущыIэ», — къы­Iуагъ министрэм.

Джащ фэдэу студент анахь чанхэу социальнэ Iофыгъохэм зиIахьышIу ахэзылъхьэхэрэм стипендие афэгъэнэфэгъэным фэгъэхьыгъэуи Павел Дорошенкэм къыIуагъ:

«Хэгъахъо зиIэ стипендиеу джырэ уахътэм щыIэр зытелъы­тагъэр шIэныгъэ е спортивнэ Iофыгъохэм чанэу закъыщызыгъэлъагъохэрэр арых. Сэ зигугъу сшIырэ стипендием социальнэ лъэныкъомкIэ нахь чанэу щытхэр зэшIуахырэм хагъэхъо­ным фигъэчэфыщтых».

Мы гукъэкIым еплъыкIэу фыриIэр Владимир Путиным къыриIотыкIыгъ:

«Студентхэм IэпыIэгъу афэхъугъэным пае бэ стипендие зэфэшъхьафэу дгъэнэфагъэу щыIэр. Общественнэ Iофыгъохэм чанэу ахэлажьэ­хэрэм грантхэмкIэ тадэIэпыIэ. Тегупшысэн тлъэкIыщт IэпыIэгъу тедзэу яттышъущтми, ау тэрэзэу дгъэнэфэн фае мылъкур зыпэIудгъэхьащтым уасэ зэрэфэтшIыщт шIыкIэр. Титарихъ изэгъэшIэн, якъэралыгъо фэшъыпкъэхэу зэрэщытынхэ фаер пхырызыщырэ ныбжьыкIэ чанхэр, щэч хэмылъэу, ашIэрэм кIэдгъэгушIунхэу щыт. Тызэдежъугъэгупшыс ар зэрэзэшIотхыщт шIыкIэм».

Общественнэ IофшIэным мэхьанэу иIэм къыкIигъэтхъызэ, тичIыгогъу кIалэм Адыгеим и ЛIышъхьэу КъумпIыл Мурати къыдыригъэштагъ.

«Студент чанхэм Урысыем стипендие тедзэхэмрэ апшъэ­рэ еджапIэхэм зыщызэдэлэжьэщтхэ чIыпIэхэмрэ къащыфыхахыщтых! Ахэм афэгъэхьыгъэ гукъэкIэу тичIыгогъоу, МКъТУ-м истудентэу Павел Дорошенкэм къыриIотыкIыгъэм непэ Урысыем и Президентэу Владимир Путиным къыдыригъэштагъ. Павел фэдэ студентхэм тарэгушхо. «Студент года-2021» зыфиIорэ лъэпкъ премием икIэух уцугъо ащ текIоныгъэ къыщыдихыгъ, ныбжьыкIэхэм я Урысые союз ишъолъыр къутамэ ипащэ игуадз, общественнэ IофшIэн ин зэшIуехы. Тырэгушхо Адыгеим истудент игукъэкI Урысыем и Президент къызэрэдыригъэштагъэм ыкIи тикъэралыгъо ар пхырыщыгъэ зэрэщыхъущтым», — къащитхыгъ КъумпIыл Мурат социальнэ хъытыухэм.

Къэбарыр хэутыным фэзыгъэхьазырыгъэр МэщлIэкъо Саид.