Мы мафэхэм Адыгеим хьакIэхэр иIагъэх, ахэр Къэрэщэе-Щэрджэс Республикэм къикIыгъэх. Мыгъэ Адыгеим къэралыгъо гъэпсыкIэ иIэ зыхъугъэр илъэси 100 зэрэхъурэр игъэкIотыгъэу зэрэхэдгъэунэфыкIыщтым фэдэу, ткъош республикэми зегъэхьазыры, ари мыгъэ лIэшIэгъу мэхъу зыщыIэр.

Джары ткъош Къэрэщэе-Щэрджэс Республикэм иволонтерхэр Адыгеим къызкIэкIуагъэхэр. Ахэр къезгъэблэгъа­гъэхэр «Культурэм иволонтерхэр» зыфи­Iорэ гупчэу тиIэр ары. Iофтхьэбзэ зэфэшъхьафхэу мы уахътэм Урысыем ыкIи тиреспубликэ щырагъэкIокIыхэрэм ахэр ахэлэжьагъэх. ЗэIукIэ гъэшIэгъон хъугъэ Урысые Федерацием IофшIэнымкIэ и ЛIыхъужъэу, Адыгеим, Къэбэр­тэе-Бэлъ­къарым, Къэрэщэе-Щэрджэсым янароднэ тхакIоу МэщбэшIэ Исхьакъ дашIыгъэр. Ар зыщыкIуагъэр КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутам ары.

МэщбэшIэ Исхьакъ хьакIэхэм адэгущыIагъ, тхэным къызэрэфэкIуагъэр къафиIотагъ.

— Утхэныр къин, ау утхакIу пIоныр ащ нахь къиныжь. Сэ къэралыгъом ичIыпIэ зэфэшъхьафхэм сащэIэ. ЦIыфэу сызыIукIагъэм «сыд уисэнэ­хьатыр» ыIоу къызысэупчIыкIэ есэIожьы: «СыкIэлэегъадж, сыжурналист». Къухьэлъатэм къыбдис узымышIэрэ цIыфым сытхакIу пIоу зепIожьыкIэ сыда къышIошIыщтыр. СытхакIу зыпIокIэ, ар гущыIэшху. Ащ къыхэкIыкIэ «сыжурналист, сыкIэлэегъадж, сыфилолог» ясэIо, — къыIуагъ И. МэщбашIэм.

Iофтхьабзэу республикэм щызэхащэхэрэм зэкIэми Адыгеим иволонтерхэм яIахь хэлъ. Джащ фэдэу ахэр «Всероссий­ский день заботы о памятниках истории и культуры» зыфиIорэм хэла­жьэх.

Адыгеир археологическэ, чIыопс ыкIи культурнэ саугъэтхэмкIэ бай. Саугъэтхэмрэ тарихъ мэхьанэ зиIэ чIыпIэхэмрэ я Дунэе мафэ фэгъэхьыгъэу музейхэм, еджапIэхэм, нэмыкI чIыпIэхэм тыкъэзыуцухьэрэ дунаир къызэрэзэтебгъэнэщтым фэгъэхьыгъэ Iофтхьабзэ зэфэ­шъхьафхэр ащызэхащэх.

Мэлылъфэгъум и 18-у саугъэтхэмрэ тарихъ мэхьанэ зиIэ чIыпIэхэмрэ зыщыхагъэунэфыкIырэ мафэм тефэу во­лон­терхэр зэгъусэхэу саугъэтхэр агъэ­къэбзагъэх, чIыпIэ гъэшIэгъонхэр къаплъыхьагъэх, Iофтхьэбзэ зэфэшъхьафхэм ахэлэжьагъэх.

«Ижъырэ Мыекъопэ пытапIэр» зыфиIорэ лъагъом тетхэу экскурсием хэлэжьагъэх, гъогур агъэкъэбзагъ. Дунэе акциеу «ШIэжьым ичъыгхат» зыфиIорэм къызэрэдилъытэу Адыгеим и ЛIыхъужъхэу Хэгъэгу зэошхом зэмыблэжьэу щызэуагъэхэм апае аллее агъэтIыс­хьагъ. Ар Мыекъуапэ ия 15-рэ гурыт еджапIэ пэблагъ. Ащ фэшъхьафэу ветеранхэр зыдэлъ къэхалъэм гъучI саугъэтхэу якъэхэм атетхэр къагъэлагъэх.

Зэкъошныгъэм иутыгоу къалэм дэтым Урысыем тишъолъырхэр зыхэхьагъэхэр илъэси 100 зэрэхъурэм фэгъэхьыгъэу флешмоб «Зы хэгъэгу — зы народ» ыIоу щызэхащагъ, ащ нэбгыри 100 хэлэжьагъ.

Мыекъуапэ игъэкъэбзэнрэ игъэ­дэхэнрэ хэлэжьагъэхэм IэпыIэгъу къафэ­хъугъэх Адыгэ Республикэм культурэмкIэ и Министерствэ, Адыгэ Республикэм икультурнэ кIэн икъэухъумэнрэ игъэфедэнрэкIэ и ГъэIорышIапIэ ялIыкIохэр, ТекIоныгъэм ыкIи экологием яволонтерхэр, Донецкэ Народнэ Республикэм щыщхэу Мыекъуапэ щыпсэухэрэр, нэмыкIхэри.

Шъаукъо Аслъангуащ.