Мэлылъфэгъум и 20-м ветеранхэм я Урысые общественнэ организацие и Адыгэ республикэ къутамэу «Боевое братство» зыфиIорэм илIыкIохэм Мыекъуапэ илицееу N 35-м икIэлэеджакIохэу я 7 — 9-рэ классхэм ащеджэхэрэм лекцие афызэхащагъ.

Организацием ипащэу Алексей Харитоновым къызэриIуагъэмкIэ, мэлылъфэгъум и 20-р шIэжь мафэу щыт, 1941 — 1942-рэ илъэсхэм Москва икъэухъу­мэн фэгъэхьыгъэ заоу кIуагъэр заухыгъэр мы мафэм тефэ. АР-м гъэсэныгъэмрэ шIэныгъэм­рэкIэ и Министерствэ планэу зэхигъэуцуагъэм тетхэу мыщ фэдэ Iофтхьабзэхэр нэмыкI еджапIэхэми ащызэхащэх, «Боевое братство» зыфиIорэ къутамэм имызакъоу нэмыкI организациехэри мыщ къыхагъэлажьэх.

— КъыткIэхъухьэрэ лIэужхэм яхэгъэгу шIу алъэгъоу къэтэджынхэм фэшI тарихъыр дэгъоу ашIэн фае. Мыщ фэдэ IофтхьабзэмкIэ тэ джары мурадэу тиIэр. Фашизмэр ыкIи нацизмэр тищыIэныгъэ къы­хэхьагъэхэ зэрэхъугъэм, ащ узэрапэшIуекIон плъэкIыщтыр ныбжьыкIэхэм къафэтэIуатэ. Хэгъэгум къулыкъур фахьын, ныбжьыкIэ объединениехэу юнармием, волонтер организациехэм ахэхьанхэ зэралъэкIыщтхэр агурэтэгъаIо, — къы­Iуагъ ветеранхэм я Урысые общественнэ организацие и Адыгэ республикэ къутамэу «Боевое братство» зыфиIорэм ипащэ.

Лицееу N 35-м пIуныгъэ-гъэ­сэныгъэ IофхэмкIэ пащэм игуа­дзэу Мамсыр Аза къызэриIуагъэмкIэ, Iофтхьабзэм хэлэжьагъэх я 7 — 9-рэ классхэм ащеджэрэ нэбгырэ 200-м ехъу. Мыщ нэмыкIэу патриотическэ мэхьанэ зиIэ Iофтхьабзэхэр еджапIэм щырагъэкIокIыгъэх. Ащ зэрилъы­тэрэмкIэ, непэ зытегущыIэхэрэ Iофтхьабзэм мэхьанэшхо иIэу щыт, кIэлэцIыкIухэм яхэгъэгу шIу алъэгъоу къэтэ­джынхэм пае пIуныгъэ тэрэз ябгъэгъотын фае.

Мы аужырэ илъэс 20-м зэо ыкIи зэпэуцужь зэфэшъхьафхэм ахэлэжьагъэу, подполковникэу Алексей Харитоновым кIэлэ­еджакIохэм кIэкIэу агу къыгъэ­кIыжьыгъ 1941 — 1942-рэ илъэсхэм Москва икъэухъумэн фэгъэхьыгъэ заор зыфэдагъэр. КIэлэеджакIохэм ашIогъэшIэгъо­нэу тарихъ къэбархэм ядэIу­гъэх, яшIошIхэр къыраIотыкIыгъэх, упчIэхэм яджэуапхэр къаратыжьыгъэх.

КIАРЭ Фатим.