Президент платформэу «Урысыер амалхэм яхэгъэгу» хэтэу я XI-рэ чIыпIэ зэнэкъокъоу «Абилимпикс» зыфиIорэр республикэм щыкIуагъ. Мы мафэхэм ащ икIэуххэр зэфахьысыжьыгъэх. Зэнэкъокъум хэлэжьагъэх сэкъатныгъэ зиIэ ныбжьыкIэхэу зиамалхэмкIэ ялэгъухэм акIэмыхьэхэрэр. Ахэр колледжхэм ястудентых, кIэлэеджакIох, сэкъатныгъэ зиIэ IофышIэх.

Зэнэкъокъухэр Мыекъопэ индустриальнэ техникумым, хьисапымкIэ зишIэ шIэгъошIухэм ягупчэу «Полярис-Адыгея» зыфиIорэм, Адыгэ къэралыгъо университетым, Мыекъопэ къэралыгъо технологическэ университетым ащыкIуагъэх.

Республикэм иеджэпIи 8-мэ къарыкIыгъэ нэбгыри 100 фэдиз зэнэкъокъум хэлэжьагъ. Ахэм ащыщхэу 54-р анахь дэгъухэу къыхахыгъэх. «АтекIуагъэр сыдэу ба?» шъуIогъэн фае. Зэнэкъо­къум хэлажьэхэрэм аныбжьыкIэ зэтефыгъэхэу лъэныкъо 16-кIэ зэнэкъокъугъэхэшъ ары. Сэ­къатныгъэ зиIэ ныбжьыкIэхэм язэнэкъокъу щыщэу студентхэм яIофшIагъэхэр къызэрахьылIэгъэ къэгъэлъэгъонэу «Гум илъыр къизыIотыкIырэр» зыфиIорэр зэхащэгъагъ. Сэнэхьат зыщызэрагъэгъотырэ гурыт ыкIи апшъэ­рэ еджапIэхэм ныбжьыкIэхэр нэIуасэ афашIыгъэх. Ахэм Iоф зыщашIэн алъэкIыщтхэм, чIыпIэ нэкI зиIэхэм ащагъэгъозагъэх, мастер-классхэр афызэхащагъэх. Iэнэ хъураеу щыIагъэр сэкъатныгъэ зиIэ ныбжьыкIэм IофшIэн агъотыным къиныгъоу пылъхэм ехьылIэгъагъ.

Мыекъопэ индустриальнэ техникумым щыкIогъэ Iофтхьабзэу «Ярмарка вакансий» зыфиIорэм IофшIапIэхэм ялIыкIохэр къырагъэблэгъагъэх. Ащ тетэу Мыекъопэ машинэшI заводым, щэ комбинатэу «Адыгейскэм», ООО-у «Тамбовскэм», редукторышI заводым ыкIи нэмыкI Iоф­шIапIэхэм къарыкIыгъэхэр ащ хэлэжьагъэх. Ахэм ящыкIэгъэ специалистхэм ныбжьыкIэхэр ащагъэгъозагъэх, яупчIэхэм джэуапхэр къаратыжьыгъэх.

ЦIыфхэм IофшIэн ягъэгъотыгъэнымкIэ Адыгэ республикэ Гупчэм ипащэу Владимир Черниченкэм къызэриIуагъэмкIэ, зэнэкъокъум хэлэжьэрэ ныбжьыкIэхэм Мыекъуапэ ищыкIэгъэ сэнэхьатхэм нэIуасэ зызэрэфашIыгъэм имызакъоу, респуб­ликэм инэмыкI чIыпIэхэми Iоф­шIэпIэ чIыпIэ нэкIэу яIэхэри зэрагъэшIэнэу амал яIагъ.

Анахь дэгъоу къыхахыгъэхэм зэкIэми ацIэ къэтпчъын тлъэкIыщтэп, ау нэбгырэ заулэмэ ацIэ къетIон. Валерия Дашковамрэ Лия Пироговамрэ данэм сурэт тырашIыхьэ, художественнэ дизайнымкIэ — Лаура Ересько, Чэдыгэ Амирэ псэолъэшIынымкIэ, дэнымкIэ — Екатерина Телепковар, робототехникэмкIэ — Дмитрий Гридневыр ыкIи нэмыкIхэр. Зэрэзэнэкъокъугъэхэ сэнэхьатхэм ащыщых зэдзэкIын Iофыр, текстым Iоф дэпшIэныр, къэбарлъыгъэIэс щынэгъончъэныр, пхъэм хэбзыкIыгъэныр ыкIи нэмыкIхэр. Сэкъатныгъэ зиIэ ныбжьыкIэхэм язэнэкъокъу мыгъэ яхэнэрэу зэхащагъ. Ащ илъэс къэс кIэщакIо фэхъу сэкъатныгъэ зиIэхэм ядвижениеу «Абилимпикс» зыфиIорэм ичIыпIэ гупчэрэ президент платформэу «Урысыер — амалхэм яхэгъэгу» зыфи­Iорэмрэ. Ахэм IэпыIэгъу афэхъу АР-м гъэсэныгъэмрэ шIэныгъэм­рэкIэ и Министерствэ. Сихъу Гощнагъу.