Адыгеим игъогу проектхэм къадыригъэштагъ
Джырэблагъэ Росавтодорым ипащэ Адыгеим щыIагъ. Республикэм и ЛIышъхьэу КъумпIыл Мурат правительствэм и Унэ ащ зэIукIэгъу щыдыриIагъ. Анахь Iофыгъо шъхьаIэу зытегущыIагъэхэр шъолъырым итранспорт инфраструктурэ изегъэушъомбгъун ары.
ГъэрекIо федеральнэ гъогушIхэм автомобиль гъогу участкэу А-146 «Краснодар — Верхнебаканский» зыфиIоу километрэ 15 зикIыхьагъэр дэгъоу агъэцэкIэжьыгъ. ВодительхэмкIэ щынэгъончъэу щытыным фэшI мы участкэм икIыхьагъэкIэ нэфынэр къэзытырэ пкъыгъохэр тырагъэуцуагъэх, къэшIыхьагъэхэр, гъогу тамыгъэхэр ыкIи гъэтхъыгъэхэр агъэкIэжьыгъэх, нэфрыгъуазэхэр агъэуцугъэх.
Мыекъуапэ идэхьагъу къыщегъэжьагъэу Кавказ къэралыгъо биосфернэ заповедникым екIуалIэу километрэ 12 фэдиз хъурэ гъогур агъэкIэжьыгъ.
Ащ нэмыкIэу лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэр шъолъырым зэрэщагъэцакIэрэм тегущыIагъэх. Мы илъэсым лъэпкъ проектым къыдыхэлъытагъэу километрэ 33-м къыхиубытэрэ чIыпIэ 34-рэ агъэцэкIэжьынэу унашъо щыI. ГъэцэкIэжьынхэм апэIуагъэхьанэу сомэ миллиарди 2,3-рэ къалъытагъ, ащ щыщэу миллион 850-р — федеральнэ, миллиард 1,4-р шъолъыр бюджетхэм къахахыщтых.
— Инфраструктурэм иIофыгъохэм лъэшэу тынаIэ атет. БлэкIыгъэ илъэсым лъэпкъ проектым игъэцэкIэнкIэ къэгъэлъэгъонэу щыIэхэм къядгъэхъугъ. Республикэм итранспорт инфраструктурэ хэхъоныгъэ егъэшIыгъэнымкIэ IофшIэнхэм ябагъэ хэдгъахъозэ къэгъэлъэгъонышIухэр тиIэу, ыпэ итэу тэкIо, — къыIуагъ АР-м и ЛIышъхьэу КъумпIыл Мурат. Росавтодорым ипащэу Роман Новиковым лъэпкъ проектыр гъэрекIо Адыгеим зэрэщагъэцэкIагъэм осэшIу къыфишIыгъ.
— Адыгеим и ЛIышъхьэ тхьамэтагъор зыдызэрихьэрэ проектнэ офисым лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм ылъэныкъокIэ Iофышхо ышIагъ. ТапэкIи а лъагъом тытетэу IофшIэныр лъыдгъэкIотэн фае. Непэ пшъэрылъ шъхьаIэу тиIэр игъом зэзэгъыныгъэхэр адэшIыгъэнхэр ыкIи IофшIэнхэм апэIухьащт мылъкур зэрищыкIагъэм тетэу гъэфедэгъэныр ары. Федеральнэ мэхьанэ зиIэ гъогухэм ягугъу пшIын хъумэ, ахэм якIыхьагъэ бэп, километрэ 223-рэ мэхъу. Арэу щытми, мэхьанэшхо зиIэ транзитнэ транспортыр бэу рэкIо. Федеральнэ ыкIи шъолъыр мэхьанэ зиIэ гъогухэр лъэхъаным диштэу зэтегъэпсыхьэгъэнхэм, автомобилыр зезыфэхэрэмкIэ гъогур гупсэфэу щытыным ыкIи гъогухэм авариеу ащыхъурэр нахь макIэ шIыгъэным тызэгъусэу тапэкIи Iоф дэтшIэщт, — къыIуагъ Роман Новиковым.