«Урысыем иэкономикэ зэтыригъэзын, ибэдзэршIыпIэ иIофхэр зэхигъэтэкъон, къэралыгъом ищапIэхэм товар атемылъыжьэу къагъэнэн гухэлъ зиIагъэхэм ар къадэхъугъэп. Iофхэр зыпкъ еуцожьых», — къыIуагъ УФ-м и Президентэу Владимир Путиным экономикэм иIофхэм язытет фэгъэхьыгъэ зэхэсыгъом къызыщэгущыIэм.

Долларым ыуасэ мэзэе мазэм зэрэщытыгъэм къэсыжьыгъ, щэпIэ гупчэшхохэм IэпэчIэгъанэу яIагъэр зэтырагъэуцожьы, IофшIэпIэ чIыпIэр чIэзынагъэхэм япчъагъи къе­Iыхыгъ. Арэу щытми, бизнесым гумэкIыгъохэр имыIэхэу пIон плъэкIыщтэп, инфляциер зэрэдэкIоягъэм къыхэкIыкIэ, цIыфхэм къаIэкIахьэрэр афи­къужьырэп.

Мы къиныгъохэм ядэгъэзыжьын фытегъэпсыхьагъэу зэшIохыгъэн фаехэм Владимир Путиныр къытегущыIэзэ, аужырэ мазэрэ ныкъорэм уасэхэр проценти 9,4-кIэ зэрэдэкIоягъэ­хэр, мэлылъфэгъум и 8-м нэс пштэмэ, инфляцием процент 17,5-рэ зэрэхэхъуагъэр къы­Iуагъ.

— Мы пчъагъэхэр ин дэдэх, цIыфхэм лъэшэу ар зэхашIэ, — къыхигъэщыгъ къэралыгъом ипащэ. — Ащ тыкъыпкъырыкIызэ социальнэ ахъщэ тын зэфэшъхьафхэр, пенсиехэр, бюджетым епхыгъэу Iоф зышIэхэрэм ялэжьапкIэхэр индексацие тшIыщтых. Ахэм ахэхъощтыр зыфэдизым игъэнэфэн Правительствэр мы уахътэм дэлажьэ, тхылъэу ищыкIагъэхэр къегъэхьазырых. Арышъ, яIофшIэн нахь агъэпсынкIэн фае.

Экономикэм, IофшIэнымкIэ бэдзэршIыпIэм язытет зэпымыоу лъыплъэнхэуи, бизнесым зыпкъ итэу Iоф ышIэным ищыкIэгъэ Iофтхьабзэхэр игъом зэшIуахынхэуи Владимир Путиным къафигъэпытагъ.