Автомобиль гъогу Iахьэу А-146 «Краснодар – Верхнебаканский» зыфиIорэм ия 19-рэ километрэ транспорт зэхэкIыпIэ щышIыгъэныр мы илъэсым Адыгеим щырагъэжьэщт. Росавтодорым ипащэу Роман Новиковым Адыгеим и ЛIышъхьэу КъумпIыл Мурат джырэблагъэ дыриIэгъэ зэхэсыгъом ар къыщиIуагъ.

Мыщ ыпэкIэ Тэхъутэмыкъое районым иавтомобиль гъогоу А-146 «Краснодар — Верхнебаканский» зыфиIоу къыблэмкIэ Краснодар къыухьэу ыкIи Новороссийскэ лъэныкъомкIэ къи­кIэу Пшызэ къекIуалIэрэм зэ­хэкIыпIэ щышIыгъэным ипроект хэплъагъэх. ЗэрагъэнэфагъэмкIэ, IофшIэнхэр 2022 — 2026-рэ илъэсхэм ателъытэгъэ­щтых, зэкIэмкIи сомэ милларди 10,7-м ехъу пэIуагъэхьанэу къалъы­тагъ.

Росавтодорым ыгъэхьазырыгъэ проектым къызэрэщыдэлъы­тагъэмкIэ, ащ къэралыгъом игупчэ хы ШIуцIэ Iушъом рип­хыщт ыкIи Урысыем и Къыблэ гъогу сеть зегъэушъомбгъугъэным изы Iахьэу щыт.

Ащ нэмыкIэу, 2024-рэ илъэсым нэс Росавтодорыр икIэщакIоу Адыгеим игъогу Iахьищэу А-160 «Мыекъуапэ — Бжъэ­дыгъухьабл — Адыгэкъал —Усть-Лабинск — Кореновск» зыфиIохэу километрэ 38-рэ хъурэм гъэцэкIэжьын дэгъухэр арашIылIэщтых.