Урысыем и Президентэу Владимир Путиным пшъэрылъ зэрафишIыгъэм тетэу промышленностымрэ лизинг компаниехэмрэ зязыгъэушъомбгъурэ фондхэм апае шъолъырхэм мылъку къафатIупщыщт. Кремлым исайт зэритымкIэ, хэгъэгум ишъолъырхэм социальнэ-экономикэ IэпыIэгъу ягъэгъотыгъэным фэгъэхьыгъэгъэ зэIукIэм икIэуххэм атетэу ащ фэдэ унашъор аштагъ. Промышленностым хэхъоныгъэ езыгъэшIыщт шъолыр программэхэм адиштэу промышленностым зезыгъэушъомбгъурэ шъо­лъыр фондхэм апае федеральнэ мылъку тедзэ чIыпIэхэм къафэтIупщыгъэнэу Урысые Федерацием и Правительствэ ыухэсыгъ. Урысые Федерацием и Правительствэ иIэпэчIэгъэнэ фонд ары мылъкур къызыхагъэкIыщтыр. Адыгэ Республикэм сомэ миллион 15,2-м ехъу къыIукIэщт.

Бюджет мылъкур атегощэгъэнымкIэ парламент комиссием къызыдырегъэштэ нэуж Урысые Федерацием и Правительствэ ащ фэдэ унашъо зиштагъэр. Адыгэ Республикэм ыцIэкIэ Къэралыгъо Думэм идепутатэу Владислав Резник ащкIэ IэпыIэгъу къафэхъугъ. Ащ къызэрэхигъэщыгъэмкIэ, промышленностым хэхъоныгъэ езыгъэшIырэ республикэ фондым пае мылъкоу къа­тIупщыщтымкIэ чIыфэхэм процентэу атехъорэм ипроцент 90-м нэс предприятиехэм атыжьын алъэкIыщт.

Адыгеим и ЛIышъхьэу КъумпIыл Мурат зэрэхигъэунэфыкIыгъэм­кIэ, экономикэмрэ бизнесымрэ нахь макIэу чIэнагъэ ашIыным пае Урысыем и Правительствэ фэлъэкIырэр зэкIэ ешIэ.

«Санкциехэм къыздахьыгъэ гомыIу Iофыгъохэм ядэгъэзыжьын мылъку тедзэр фэIорышIэщт. Бизнесым производствэр къызэтыримыгъэуцоным, лэжьэкIо коллективхэр къызэтыригъэнэжьынхэм мэхьанэшхо иI», — къыIуагъ КъумпIыл Мурат.

Владислав Резник ишIошIкIэ, экономикэр чIыпIэ къин зыщыщит джырэ лъэхъаным зэпыу имыIэу промышленнэ предприятиехэм Iоф ашIэным, IэкIыб къэралыгъохэм къащашIырэ продукцием фэдэхэр къыдагъэкIынхэм мэхьанэшхо яI.

«Шъолъырхэм социальнэ-экономикэ IэпыIэгъу ягъэгъотыгъэным фэгъэхьыгъэгъэ зэIукIэу гъэтхапэм щыIагъэм икIэуххэм атетэу Урысые Федерацием и Президент Правительствэм пшъэрылъ фишIыгъ промышленностым зезыгъэушъомбгъурэ шъолъыр фондхэм федеральнэ мылъку афитIупщынэу», — къыIуагъ Владислав Резник.