Тульскэм щыкIощт
Театрэм пыщэгъэ кIэлэцIыкIухэр зыхэхьэрэ купхэм яшъолъыр фестиваль мэлылъфэгъум и 23-м Мыекъопэ районым культурэмкIэ илъэпкъ Гупчэ щыкIощт.
Адыгэ Республикэм и Къэралыгъо программэу культурэм хэхъоныгъэ егъэшIыгъэныр агъэцакIэзэ, Адыгеим культурэмкIэ и Министерствэ, Адыгэ Республикэм лъэпкъ культурэмкIэ и Гупчэ Iофтхьабзэр зэхащэ. Культурэм зегъэушъомбгъугъэнымкIэ Урысыем и Президент 2014-рэ илъэсым, мэзаем и 3-м унашъоу ышIыгъэр щыIэныгъэм щыпхыращызэ, къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фестивалыр фагъэхьы.
— Хэгъэгум итеатральнэ культурэ кIэлэцIыкIухэр нахь фэщагъэхэу пIугъэнхэм, драматургием, литературэм, музыкэм, лъэпкъ къашъохэм афэгъэсэгъэнхэм афэшI фестивалым имэхьанэ зыкъеIэты, — къытиIуагъ Адыгэ Республикэм лъэпкъ культурэмкIэ и Гупчэ ипащэу Бадый Къэплъан. — Хабзэм икъулыкъушIэхэр, общественнэ организациехэм ахэтхэр кIэлэцIыкIу театральнэ искусствэм нахьышIоу щыдгъэгъуазэхэ тшIоигъу.
2022-рэ илъэсыр къэралыгъом щыпсэурэ лъэпкъхэм яискусствэрэ якультурнэ кIэнрэ я Илъэс. ЗэхэщакIохэм ар къыдалъыти, сэнаущыгъэ зыхэлъ кIэлэцIыкIухэр къыхэгъэщыгъэнхэм, лъэпкъ шэн-хабзэхэм язехьан кIэлэеджакIохэр афэгъэсэгъэнхэм, патриотическэ пIуныгъэр нахь игъэкIотыгъэу зэхэщэгъэным яхьылIэгъэ амалхэр къагъотыгъэх.
Театрэхэр опытэу яIэхэмкIэ зэхъожьыщтых, кIэлэцIыкIу театрэхэм ярежиссерхэм, драматургхэм ятворчествэ хагъэхъощт. Театральнэ искусствэм щагъэфедэрэ зэлъыIэсыкIэ амалхэр фестивалым къыщаIотэщтых.
Илъэс 16-м нэс зыныбжьхэр зэнэкъокъущтых. Астрахань, Волгоград хэкухэм, Краснодар, Ставрополь крайхэм, Дагъыстан, Къэбэртэе-Бэлъкъарым, Адыгеим якIэлэцIыкIу театрэхэр фестивалым щызэIукIэщтхэу зэхэщакIохэм къытаIуагъ. ТекIоныгъэр хэт къыдихыщтми, фестивалым лъэужышIу театральнэ искусствэм къыщигъэнэщтэу Бадый Къэплъан елъытэ.
ЕмтIылъ Нурбый.