Мэлылъфэгъум и 11-м къыщегъэжьагъэу и 30-м нэс гъэсэныгъэмкIэ Урысые проектэу «Пчъагъэм иурок» зыфиIорэр республикэм щэкIо. Ащ очнэу ыкIи пэIудзыгъэ шIыкIэм тетэу республикэм иеджапIэхэр хэлажьэх.

Iофтхьабзэм изэхэщакIу рес­публикэ естественнэ-хьисап еджапIэм цифровой гъэсэны­гъэм­кIэ и «IT-куб».

Мэлылъфэгъум и 15-м хьисап еджапIэм «Быстрая разработка приложении» зыфиIорэ урокыр щыкIуагъ. Адыгэ къэралыгъо университетым икIэлэегъаджэу Алексей Качко къызэриIуагъэм­кIэ, пэрыт технологиехэр бгъэфедэхэзэ программэхэм язэхэгъэуцон урокыр фэгъэхьыгъагъ. Ащ къыхэлажьэрэр зэкIэри IТ специалист хъунэу арэп. Ау информационнэ технологиехэм тIэкIу нэмыIэми ахэзымышIыкIырэм мы дунаим щыпсэуныр къин къыщыхъущт.

ПэIудзыгъэ шIыкIэм тетэу еджэпIэ 30-мэ яя 7 — 11-рэ классхэм якIэлэеджакIохэр урокым къыхэлэжьагъэх. Очнэу хэлэжьэнхэу урокым нэбгырэ 15 къекIолIэгъагъ.

«Пчъагъэм иурок» зыфиIорэр гъэсэныгъэ къэзытырэ Урысые проектэу щыт. Урокым ишIуагъэкIэ зэлъашIэрэ технологическэ компаниехэм шIэныгъэ­хэр кIэлэеджакIохэм арагъэгъо­тых.