Мэлылъфэгъум и 14-м ыкIи и 15-м Адыгэ къэралыгъо университетым «Проектная культура» зыфиIорэ Iофтхьабзэр щыкIуагъ. Проектнэ гупшысакIэм ипрограммэ хэтэу ар зэхащэгъагъ.

Грантхэр зэрылъ зэнэкъокъухэм ахэлажьэ зышIоигъохэмкIэ ар еджэпIэ дэгъу хъугъагъэ. ЫпкIэ хэмылъэу ащ хэлэжьагъэх ныбжьыкIэ политикэмкIэ специалистхэр, кIэлэегъаджэхэр ыкIи студентхэр.

«Проектнэ культурэм» ипрограммэу проектнэ гупшысакIэм уфэзыгъасэрэр Iахьи 4-у гощыгъагъэ. Iахь пэпчъ проектхэм Iоф адэшIэгъэнымкIэ куп гъэнэфагъэ телъытагъэу щытыгъ.

«Проектым пшъэрылъ шъхьаIэу иIэр ныб­жьыкIэхэм ашIэн алъэкIыщтыр, ахэм яамалхэр ежьхэм зыдашIэжьынхэр ары, — еIо проектым ипащэу Владимир Купиным. — Тэ проектыр щыIэныгъэм щыщ зэрэпшIыщтыр, ахъщэу текIодэщтыр къыздикIыщтыр афэтIотагъ. Непэ социальнэ лъэныкъом Iоф щыпшIэн зэрэфаер агурыдгъэIуагъ». Социальнэ щыIакIэм зишIуагъэ къыщыкIощт проектхэм язэхэгъэуцон ары мэфитIум кIогъэ Iофтхьабзэм анаIэ зыщытетыгъэр.