ЦIыфхэм IофшIапIэ ягъэгъотыгъэнымкIэ федеральнэ къулыкъум и ГъэIо­рышIапIэу Адыгеим щыIэм ипащэу Галина Цыганковар зыхэлэ­жьэ­гъэ «зэдэгущыIэгъу занкIэ» шъолъыр гъэIорышIэнымкIэ Гупчэм зэхищагъ.

Федеральнэ проектэу «Объясняем.рф» зыфиIорэм къы­дыхэлъытагъэу гъэIорышIапIэм и VK.com зэдэгущыIэгъур игъэ­кIотыгъэу къырагъэхьагъ. ЦIыф­хэм ыкIи IофшIэн языгъэгъотыхэрэм къэралыгъо IэпыIэгъоу аратырэм къулыкъум ипащэ къатегущыIагъ.

— Лъэпкъ проектэу «Демография» зыфиIорэм къыдыхэлъытагъэу мы илъэсым гъэтхапэм и 28-м къыщегъэжьагъэу еджэжьы зышIоигъохэм ЗыкI цифрэ платформэм зыщатхын амал яIэ хъугъэ. Гъэсэныгъэм ипрограммэ мин 23-м ехъу ащ рагъотэщт. Егъэджэнхэр федеральнэ операторищмэ зэхащэ — Урысыем и Ворлдскиллс, Томскэ къэралыгъо университетыр, народнэ хъызмэтымкIэ ыкIи къэралыгъо къулыкъумкIэ Урысые академиер. (РАНХиГС). Заявкэр затыгъэм мэфищ зытешIэкIэ профориентациер акIу­нэу IофшIэн ягъэгъотыгъэнымкIэ гупчэм къекIолIэнхэ фае, — къыIуагъ Галина Цыганковам.

Джащ фэдэу гъэIорышIапIэм ипащэ къызтегущыIагъэхэм ащыщ шъолъырым IофшIэнымкIэ ибэдзэр изытет. ЦIыфхэм IофшIэпIэ чIыпIэ ягъэгъотыгъэнымкIэ къулыкъум и ГъэIоры­шIапIэу Адыгеим щыIэм иучет IофшIэн зимыIэу нэбгырэ 1700-рэ хэт.

— Республикэм щыпсэухэу Iоф зышIэхэрэм япчъагъэ на­хьыбэ мэхъу, пандемием илъэ­хъани ар къехыгъэп. Мэзаем ыкIэхэм яхъулIэу къызэралъытагъэмкIэ, нэбгырэ мини 189,9-мэ Iоф ашIэ, 2022-рэ илъэсым имэзитIу ар проценти 2,4-кIэ нахьыбэ хъугъэ, — хигъэунэфыкIыгъ Галина Цыганковам.

IофшIэн языгъэгъотыхэрэм алъэныкъокIи мы къулыкъум IэпыIэгъу зэфэшъхьафхэр щыгъэнэфагъэх. ГущыIэм пае, Iоф­шIэпIэ чIыпIэ языгъэгъотырэ къулыкъум зыкъыфэзыгъэзэгъэ ыкIи хэушъхьафыкIыгъэ цIыф купхэм IофшIапIэ языгъэгъотыгъэхэм лэжьапкIэу атырэр къа­фызэкIагъэкIожьын амал щыI. IофшIэн зарагъэгъотыгъэм мазэ, мэзищ ыкIи мэзих зытешIэкIэ, социальнэ страхованиемкIэ Фондым субсидиер къаритыщт. Джыри зы амалэу щыIэхэм ащыщ IофшIэн лъыхъухэрэм ыкIи ар зимыIэхэм общественнэ IофшIэнхэр афызэхэзыщэхэрэм субсидиехэр ятыгъэнхэр. НэмыкI упчIэу цIыфхэр зыгъэгумэкIыхэрэми Галина Цыганковам джэуапхэр къаритыжьыгъэх.