Къоджэ спортым илъэсыбэрэ Iоф щызышIагъэу, шъхьафит бэна­кIэмкIэ зыгъэсапIэ Щынджые къыщызэIузыхыгъэ тренерэу Тэча­хъо Байзэт фэгъэхьыгъэ шIэжь зэнэ­къокъур Тэхъутэмыкъое районым ипсэупIэу Яблоновскэм мэлылъфэгъум и 24-м щыкIощт.

— Зэнэкъокъур Щынджые щызэхэтщэн тимурадыгъ, ау нэбгырабэ зэрэхэлэжьэщтым фэшI Яблоновскэм ия 3-рэ спорт еджапIэ щыредгъэкIокIынэу итхъухьагъ, — къытиIуагъ Щынджые бэнэпIэ еджапIэм итренерэу Бэгугъэ Мыхьарбый.

Шъхьафит бэнакIэмкIэ зыгъэсапIэр Щынджые зыщызэхащэжьыгъэр илъэсищ мэхъу. Къоджэ спортым зеушъомбгъу, физкультурэм ыкIи спортым апыщагъэхэм япчъагъэ хэхъо.

Шъхьафит бэнакIэмкIэ нахьыжъхэр зыхэт купым зыщагъасэ Батмэн Азэмат, Тэчахъо Айдэмыр, Трахъо Аслъан, Мырзэ Аслъан. КIалэхэр зэнэкъокъухэм ахэлажьэх, медальхэр къахьых.

КIэлэцIыкIухэу Мамый Алим, ЕмтIылъ Сул­тIан, ЕмтIылъ Имран, Мамый Дамир шъхьафит бэнакIэр ашIогъэшIэгъон. Зэнэкъокъум зыфагъэхьазырзэ, кIуачIэр апсыхьэ, яIэпэIэ­сэныгъэ хагъахъо. ХагъэунэфыкIырэ чIыпIэхэр къыдахын ямурад.

Краснодар краим, Абхъазым, Къэрэщэе­-Щэрджэсым, Адыгэ Республикэм ябэнакIохэр Тэчахъо Байзэт фэгъэхьыгъэ шIэжь зэнэкъо­къум хэлэжьэщтых.