Республикэ зэхэщэкIо комитетэу «ТекIоныгъ» зыфиIорэм изэхэсыгъоу щыIагъэр зэрищагъ ащ итхьаматэу, Адыгеим и ЛIышъхьэу КъумпIыл Мурат. ТекIоныгъэм ия 77-рэ илъэс имэфэкIэу жъоныгъуакIэм хагъэунэфыкIыщтым изыфэгъэхьазырын, мыщкIэ пшъэрылъ шъхьаIэу щытхэм къэзэрэугъоигъэхэр атегущыIагъэх.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, республикэм и Премьер-министрэ иIэнатIэ зыгъэцэкIэрэ КIэрэщэ Анзаур, министрэхэм я Кабинет хэтхэр, муниципалитетхэм япащэхэр, хэбзэухъумэкIо къулыкъухэм ыкIи УФ-м ошIэ-дэмышIэ Iоф­хэмкIэ и Министерствэ и Гъэ­IорышIэпIэ шъхьаIэу АР-м щыIэм ялIыкIохэр.

Адыгеим и ЛIышъхьэ зэхэсыгъом пэублэ псалъэ къыщишIызэ, тицIыфхэм анахь мэхьанэшхо зэратырэ ТекIоныгъэм и Мафэ зэрифэшъуашэу хэгъэунэфыкIыгъэн зэрэфаер къыхигъэщыгъ, ащкIэ ведомствэхэм, къулыкъухэм, муниципалитетхэм пшъэрылъхэр къафишIыгъ.

— Пандемием илъэхъан игъэкIотыгъэ Iофтхьабзэхэр зэхэтщэнхэу хъугъэп, мы мафэр икъу фэдизэу дгъэмэфэкIын тлъэкIыгъэп. Джы эпидемиологием изытет нахьышIу хъугъэшъ, Те­кIоныгъэм и Мафэ зэри­фэшъуашэу, зэкIэ щынэгъончъэным ишапхъэхэр къыдыхэлъытагъэхэу зэхэтщэн фае, — къы­Iуагъ КъумпIыл Мурат.

ТекIоныгъэшхом ихэгъэунэфыкIын изыфэгъэхьазырын, ащ къыдыхэлъытэгъэ Iофтхьэбзэ шъхьаIэхэу зэхащэщтхэм гухэлъ­хэу щыIэхэм къатегущыIагъэх АР-м культурэмкIэ министрэу Аулъэ Юрэ, Мыекъуапэ имэрэу Геннадий Митрофановыр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.

ЗэрэхагъэунэфыкIыгъэмкIэ, жъоныгъуакIэм и 1-м щегъэжьагъэу и 9-м нэс мэфэкI зэIукIэгъухэр, къэгъэлъэгъонхэр, куль­турнэ Iофтхьабзэхэр республи­кэм щыкIощтых. Ахэм ащыщых АР-м и Къэралыгъо филармоние щыкIощт мэфэкI зэхахьэр ыкIи концертыр, «МыкIодыжьыщт полк» зыфиIорэ Iофтхьабзэр ыкIи дзэкIолI пщэрыхьапIэр зэхащэщтых, творческэ купхэм якъэгъэлъэгъонхэр, шыгъачъэр, нэмыкIхэри. МэфэкIыр мэ­шIоустхъумкIэ зэфашIыжьыщт.

ПэшIорыгъэшъэу зэрагъэ­на­фэрэмкIэ, мы илъэсым «МыкIодыжьыщт полкым» нэбгырэ мин 20 фэдиз хэлэ­жьэщт. Советскэ Союзым и ЛIыхъужъхэм, Щытхъум иорден икавалерхэм ясурэтхэр аIыгъхэу апэрэу юнар­мейцэ 58-рэ урамым къы­рыкIощтых.

Муниципалитетхэм ащыкIощт Iофтхьабзэхэм, политическэ партиеу «Единэ Россием» ишъо­лъыр къутамэ мэфэкIым епхыгъэу зэхищэ­рэ IофшIэным афэ­гъэ­хьыгъэ докладхэр къашIы­гъэх. Хабзэ зэ­рэ­хъу­гъэу, жъоны­гъуакIэм и 9-м ехъулIэу ветеран­хэм шIухьафтынхэр араты- щтых.

Зэхэсыгъом икIэух рагъэ­кIокIыщт IофтхьабзэхэмкIэ пшъэдэкIыжь зыхьыщтхэр агъэ­нэфэнхэу, Хэгъэгу зэошхом иветеранхэм ыкIи ахэм ара­гъап­шэрэ цIыф купхэм зэрифэшъуашэу анаIэ атырагъэтынэу АР-м и ЛIышъхьэ пшъэрылъ афи­шIыгъ.

Iэшъынэ Сусан.