Урысыем и Темыр-Кавказ шъолъыррэ Адыгеимрэ зекIон хъызмэтым зегъэушъомбгъугъэным фэгъэхьыгъэ зэзэгъыныгъэ зэдашIыгъ, Дербент (Дагъыстан) щызэхащэгъэгъэ зэIукIэгъум ащ щыкIэтхагъэх.

Зэзэгъыныгъэм къызэ­рэщиIорэмкIэ, Темыр­-Кавказ федеральнэ шъо­лъырым хэхьэрэ субъ­ектиблымрэ Адыгеимрэ зе­кIоныр нахьышIоу зэрагъэпсынэу зы туристическэ бренд агъэпсыщт. ЗыкIыныгъэ ахэлъэу Iоф зэдашIэмэ, субъект пстэуми яэкономикэ зыкъиIэтыщт.

Iофтхьабзэм кIэщакIо фэхъугъэх Темыр-Кавказ федеральнэ университетымрэ Дагъыстан зекIонымкIэ и Министерствэрэ. Ахэм къадырагъэ­штагъ УФ-м и Къэралыгъо Думэ зекIонымкIэ и ко­митет, Ростуризмэм, Урысые Географическэ обществэм, туриндустрием ялIыкIохэм, экспертхэм, нэмыкIхэм.

Темыр-Кавказ федеральнэ университетым иректорэу Дмитрий Бес­паловым къызэриIуагъэмкIэ, джырэ лъэхъэнэ гумэкIыгъом зекIоным хэхъоныгъэхэр зэребгъэшIынхэ плъэкIыщтым узэдытегущыIэмэ, Темыр Кавка­зыми Адыгеими язекIон хъызмэт зиушъомбгъущт.

Ащ къыдыригъэштагъ Урысыем и Къэралыгъо Думэ идепутатэу Николай Валуевым. «Сицыхьэ телъ тызытегущыIэгъэ Iофыгъо­хэм язэшIохынкIэ къы­хэтхыгъэ шIыкIэ-амалхэр нэ­мыкI шъолъырхэми зэ­рэщагъэфедэщтхэм, — къыIуагъ ащ. — ЗекIоным шIогъабэ къытыщт, шъо­лъыр пстэуми инфраст­руктурэу ащыдгъэпсырэм Урысыеми, чIыпIэхэми яэкономикэ къыгъэбаищт».