Къухьэлъатэхэр Тыркуем быбынхэу, тицIыфхэр зыгъэпсэ­факIо ащэнхэу жъоныгъокIэ мэфэкIхэм рагъэжьэжьыщт.

Ростуризмэм ипащэрэ Тыркуем культурэмрэ зе­кIонымрэкIэ иминистрэрэ бэмышIэу зэдэгущыIэгъоу зэдыряIагъэм а Iофыгъом игугъу щашIыгъ. ТицIыфхэр зыгъэпсэфыгъо уахътэм Тыркуем кIон­хэм пае шIэгъэн фаехэм атегущыIагъэх.

Тыркуемрэ Египетрэ узэрэкIощт путевкэхэм ауасэ процент 40 фэдиз къыхэхъуагъэу блэкIыгъэ илъэсым игъэтхапэ къаIогъагъ. ХьакIэщ-хэм узэрарысыщтым те­фэрэр джы фэдитIукIэ нахьыбэ хъугъэ. ГущыIэм пае, Тыр­куем узэрэкIощтым блэ­кIыгъэ илъэсым сомэ мин 50 — 60 лъатыщтыгъэмэ, джы ащ ыуасэ сомэ мини 110-м къыщежьэ.

Ащ дакIоу Урысыем икIыхэрэр ашIомыкIодынхэм ыкIи гъэмэфэ зы­гъэпсэфыгъор къэмысызэ хэкIыпIэхэр къагъотынхэм афэшI Тыркуем иведомствэ шъхьаIэхэм хэу­шъхьафыкIыгъэ авиакомпание зэхащэнэу рахъу­хьагъ. Ащ икъухьэлъатэ­хэм Урысыем щыпсэурэ цIыфхэр гъэ реным Тыркуем ащэщтых.

Къухьэлъатэхэм Урысыем ицIыфхэр зынагъэсыщтхэр Анталиер ары. АвиакомпаниякIэу зэхащэрэм изакъоу нэбгырэ миллион фэдиз Тыркуем мыгъэ нигъэсыщт, нэмыкI компаниехэри ахэтхэмэ, нэбгырэ миллионищ фэдизмэ Тыркуем зыща­гъэпсэфын алъэкIыщт.