Адыгеим и ЛIышъхьэу КъумпIыл Мурат кIэлэцIыкIухэм языгъэпсэфыгъо уахътэ изэхэщэнкIэ 2022-рэ илъэсым игъэмафэ Iофтхьабзэу зэрахьащтхэм зызэрафагъэхьазырырэм фэгъэ­хьы­гъэ зэхэсыгъом хэлэжьагъ. УФ-м и Правительствэ и Тхьаматэ игуадзэу Татьяна Голиковам ар зэрищагъ.

Iофтхьабзэр къызэIуихызэ вице-премьерым шъолъырхэм «тхьашъуегъэпсэу» къариIуагъ 2021-рэ илъэсым, коронавирусым лъэшэу зыкъызщиIэтыгъэгъэ лъэхъаным, кIэлэцIыкIу­хэм языгъэпсэфыгъо уахътэ дэгъоу гъэмафэм зэрэзэхащэгъагъэм фэшI.

Мыгъэ кIэлэцIыкIу миллиони 5-м ехъумэ лагерьхэм заща­гъэпсэфын, япсауныгъэ аща­гъэпытэн алъэкIыщт. Ащ пае сомэ миллиард 58,9-рэ къа­тIупщыщт. ГъэрекIорэм нахьи процент 20-кIэ ар нахьыб.

«КIэлэцIыкIухэр лагерым зэрагъэкIощт путевкэхэр къыз­IэкIагъахьэхэ зыхъукIэ, кэш­бэкыр афытырагъахъозэ, зызщагъэпсэфыщт организациехэм кIонхэм кIэлэцIыкIухэм IэпыIэгъу зэрафэхъухэрэ программэм ипхырыщын лъагъэ­кIотэщт. Мыгъэ программэм нахьыбэу мылъку къыфыхагъэ­кIыщт. Сомэ миллиарди 4 ар гъэрекIо хъущтыгъэмэ, мы илъэ­сым миллиарди 7,5-м нэсыщт, — къыIуагъ Татьяна Голиковам. — Каникулхэм ялъэ­хъан кIэлэцIыкIу нахьыбэмэ загъэпсэфыным пае ахэм гъэсэныгъэ тедзэ языгъэгъо-тырэ организациехэм, культу­рэмкIэ, спортымкIэ, социальнэ ухъумэнымкIэ учреждениехэм амалэу яIэхэри ащкIэ къыз­фагъэфедэн фае».

УФ-м и Правительствэ и Тхьаматэ игуадзэ зэрэхигъэу­нэфыкIыгъэмкIэ, гъэмэфэ зыгъэпсэфыгъо уахътэм изэхэщэнкIэ анахьэу анаIэ зытырагъэтын фаер лагерьхэм ящынэгъончъагъэрэ фашIэ зиIэ шхынкIэ кIэлэцIыкIухэр гъэшхэгъэнхэмрэ ары.

КIэлэцIыкIухэм языгъэпсэ­фыгъо уахътэ зыщызэхащэрэ, япсауныгъэ зыщагъэпытэрэ ор­ганизациищэу республикэм итхэм кIэлэцIыкIу 1957-мэ защагъэпсэфыщт. Ащ нэмыкIэу гурыт еджапIэхэм къащызэ­Iуахыщт лагерь 91-мэ кIэлэ­цIыкIу 4884-мэ защагъэпсэфын алъэкIыщт. ПстэумкIи кIэлэцIыкIу мини 6,8-м ехъумэ япсауныгъэ агъэпытэшъущт. Ащ пае сомэ миллион 71-рэ фэдиз къыхагъэкIыгъ.

«КоронавирусымкIэ шапхъэ­хэм ащыщхэр зэрэтырахыжьырэм епхыгъэу мыгъэ кIэлэцIыкIухэм языгъэпсэфыгъо уахътэ нэмыкIэу зэхащэщт. ТапэкIэ зэрэхэбзагъэм тетэу зекIохэр, экскурсиехэр зэхащэщтых, концертхэр къатыщтых. Минис­терствэхэм пшъэрылъ афэс­шIыгъ лагерьхэм апае программэ гъэшIэгъон зэхагъэуцонэу, Ау къэбзэныгъэмрэ эпиде­миологие шапхъэхэмрэ къызэ­рэ­да­лъытэхэрэм джыри гъунэ лъытфыщт. ФашIэ зиIэ шхынхэр кIэлэцIыкIухэм агъотынхэм ты­наIэ тедгъэтыщт», — къыIуагъ КъумпIыл Мурат.

Адыгэ Республикэм и ЛIышъхьэ ипресс-къулыкъу