КъокIыпIэм щыпсэурэ лъэпкъхэм искусствэхэмкIэ я Къэ­ра­лыгъо музей и Темыр-Кавказ къутамэ мэлылъфэгъум и 16-м экологическэ Iофтхьабзэ щыкIонэу рахъухьагъ.

Петр I-м илъэхъан щы­Iэгъэ чъыгаехэм ямышкIухэр къызфагъэфедэзэ къагъэкIыгъэ чъыгхэр му­зеим ищагу дагъэтIыс­хьащтых. Проектэу «Всероссийская дубрава императора Петра Вели­кого», фестивалэу «Цветущий сад музея Востока» зыфиIохэрэм адиштэу Iоф­тхьабзэр зэхащэ.

Апэрэ урысые императорым ия 350-рэ илъэс, Адыгеим ия 100-рэ илъэс яхъулIэу мы проектыр пхы­ращы. Чъыгаехэр Санкт-Петербург, Москва, Воронеж, Вологда, Ярославль, Тверь, Шъачэ, Белгород, Ивангород, Таллинн, Париж ыкIи нэмыкI къалэхэм ащагъэтIысхьэгъахэх.

Iофтхьабзэм хэлэжьэщтых Адыгэ Республикэм и ЛIышъхьэу КъумпIыл Мурат, Урыс музеим исектор ипащэу, биологие шIэ­ныгъэхэмкIэ кандидатэу Жукова Екатеринэ, Урысыем ихудожественнэ музейхэм адэлэжьэрэ секторым ипащэу Арис­това Айла.