Урысые Федерацием и Президентэу Владимир Путиным ыштэгъэ унашъоу Донецкэ ыкIи Луганскэ народнэ рес­пуб­ликэхэм хэушъхьафыкIыгъэ дзэ операциер ащызэхэ­щэгъэным мэхьанэу иIэр щыIэныгъэм къыщэлъагъо.

Владимир Путиным иеплъыкIэхэм адезыгъэштэрэ цIыфхэр мы ма­фэ­хэм зэхахьэхэм ахэла­жьэх. Дунэе Iофыгъохэм агъэгумэкIыхэу къызэрэгущыIэхэрэм дакIоу мамырныгъэм игъэпытэн зэ­дыряIофэу алъытэ.

Адыгэ Республикэм иветеранхэм я Совет итхьаматэу Къоджэ Ас­лъан зэхахьэм къыщиIуагъэм уегъэгупшысэ, уегъэ­гъуазэ. ЧIыпIэ «плъыр­хэм» ащыкIогъэ заохэм ар ахэлэжьагъ, отставкэм щыIэ полковник.

— Ти УIэшыгъэ КIуа­чIэхэр лъэхъаным диштэу уIэшыгъэх. Донецкэ ыкIи Луганскэ народнэ рес­публикэхэм ащыкIорэ дзэ операцием текIоныгъэр къыщыдахыным фэхьа­зырых, — къыIуагъ Къо­джэ Аслъан.

Урысыем и ЛIыхъужъэу, Адыгэ Республикэм и Парламент идепутатэу Цэй Эдуард дзэм къулыкъур щихьызэ, чIыпIэ «плъырхэм» ащыкIогъэ зэпэуцужьхэм ахэлэжьагъ. Заор зыфэдэр ешIэ.

ЛIыгъэ зепхьанымрэ жъалымыгъэ къыпхэфэнымрэ зэрэзэтекIыхэрэм Къоджэ Аслъани, Цэй Эдуарди дэгъоу щыгъуа­зэх. Джырэ уахътэ Украинэм ипащэхэм ягъусэ- хэу Iашэр къэзыштагъэхэм щынагъоу къызыдахьырэм мамыр цIыфхэр лъэшэу егъэгумэкIых. IэкIыб къэралхэм къа­рыкIыгъэхэ дзэкIолIхэр Украинэм гоуцуагъэхэу заом имашIо «кIагъэсты».

Илъэс пчъагъэ хъугъэу Украинэм рэхьатныгъэ илъэп. Хэгъэгу зэошхом илъэхъан Советскэ Союзым идзэхэм апэуцущтыгъэхэм мыхъо-мышIагъэу зэрахьэщтыгъэхэр гум къагъэкIыжьых. IэкIыб къэралэу Украинэм иIэшъхьэтетхэм адезыгъа­штэхэрэр гъогу пхэнджым зэрэтетхэр нафэ.

IэпыIэгъу зэфэхъужьынхэм фэгъэхьыгъэу Уры­сыем щыкIорэ Iофтхьабзэу «Тэ — тызэгъус» зыфиIорэм ишъолъыр штаб ипащэу Ованес Шекерьянц зэхахьэм къыщиIуагъэр непэрэ щыIакIэм къыхэхыгъ. Къэра­лыгъо зэфэшъхьафхэр зэкъоуцуагъэхэу Урысыем пэшIуекIох, тиспорт­сменхэр дунэе зэнэкъо­къухэм ахагъэлажьэхэрэп. Лъэхъаным къып­къырыкIырэ Iофхэм къаушыхьаты Урысыем ипащэу Владимир Путиныр гъогу тэрэз зэрэтетыр, ти­хэгъэгу ис цIыфхэм ащ зэрэдырагъаштэрэр.

Яджэуап зэфэдэ

Адыгэ Республикэм и Правительствэ, Парламентым, Мыекъуапэ иадминистрацие якъулыкъу­шIэхэр, общественнэ движениехэм ахэтхэр, еджапIэхэм яIофышIэхэр, студентхэр, фэшъхьафхэри зэхахьэм хэлэжьагъэх.

Мыекъуапэ икъэзэкъхэм яотдел ипащэу Александр Даниловым, Адыгеим щыпсэурэ къэндзалхэм якультурнэ обществэ ипащэу Алим Ильясовым, урымхэм якультурнэ обществэ ипащэу, спортымкIэ дунэе класс зиIэ мастерэу Аристотель Спировым, нэмыкI­хэм яеплъыкIэхэр зэде­штэх. Неонационализмэм Украинэм ис цIыфхэр те­зыгъэгушIухьэхэрэм апэуцух.

Республикэ общественнэ движениеу «Адыгэ Хасэм» хэтхэр купышхо хъухэу зэхахьэм хэлэжьагъэх. Дунаим щыцIэ­рыIо сурэтышI-модельерэу СтIашъу Юрэ, отставкэм щыIэ полковникэу ЦIыкIушъо Аслъан, Дунэе Адыгэ Хасэм ипрезидент иупчIэжьэгъоу Мэщ­фэшIу Нэдждэт, Урысыем, Адыгеим язаслуженнэ тренерэу Хъот Юныс, Абхъазым игуфакIохэм яорганизацие ипащэу ­Къуижъ Къэплъан, нэ­мыкIхэри нэбгырабэмэ гущыIэгъу афэхъугъэх.

Адыгэ Хасэм итхьаматэу ЛIымыщэкъо Рэмэзан Мыекъуапэ ипчэгу­шхоу «Зэкъошныгъэм» щыкIорэ зэхахьэм лъэпкъыбэ зэрэщызэIукIагъэр хигъэунэфыкIыгъ.

— Украинэм ис урыс­хэм яныдэлъфыбзэ, яшэн­хабзэхэр, культурэу яIэр зэрагъашIэ, яфитыныгъэ­хэр къаухъумэхэ ашIоигъу, — къытиIуагъ ЛIымыщэкъо Рэмэзан. — Бзэ уимыIэу лъэпкъ ухъущтэп. Тэ, адыгэхэм, щыIэныгъэм къыщыткIугъэ гъогум гукIэ къыфэдгъэзэжьызэ, Донецкэ ыкIи Луганскэ народнэ республикэхэм якъиныгъохэр икъу фэдизэу къыдгурэIох. Ти Президентэу Владимир Путиным детэгъаштэ.

Адыгэ Республикэм и Къэралыгъо филармоние иансамблэу «Ошъутенэм» хэгъэгум, мамырныгъэм ягъэпытэн афэгъэхьыгъэ орэдхэр зэхахьэм къыщиIуагъэх. Урысыем ибыракъ ныбжьыкIэхэм, къулыкъушIэхэм агъэбыбэ­тагъ, пчэгум щызэрахьагъ, узэкъотмэ узэрэлъэшыр зэхахьэм къыхэщыгъ.

ЕмтIылъ Нурбый.