Адыгэ Республикэм и ЛIышъхьэу КъумпIыл Мурат пшъэрылъ зэрафи­шIыгъэм тетэу Адыгэ республикэ сымэджэщэу зэпахырэ узхэр зиIэ­хэм зыщяIазэхэрэм игъэцэкIэжьын пае республикэ бюджетым сомэ миллион 20 къыхагъэкIыгъ.

Пандемием илъэхъан анахь пшъэрылъышхо зэшIозыхыгъэ­хэм а сымэджэщыр ащыщ. Ко­ронавирусыр къызэутэлIэгъэ нэбгырэ 250-м телъытагъэу ар щыт. НепэкIэ Адыгеим а узыр зиIэу исхэм япчъагъэ хэпшIыкIэу къыкIичыгъ.

Зэпахырэ узхэр къызэутэ­лIагъэхэм зыщяIазэхэрэ Адыгэ республикэ сымэджэщыр гъэцэ­кIэжьыгъэным пае корона­ви­русыр къызэутэлIагъэхэм япчъа­гъэ къызщыкIичыгъэ лъэхъаныр къызфагъэфедэщт. Адыгеим и ЛIышъхьэ Адыгэ Республикэм псауныгъэр къэухъумэгъэнымкIэ и Министерствэ ащ фэдэ пшъэ­рылъ фишIыгъ, ищыкIэгъэ Iоф­шIэнхэр зэкIэ дэгъоу ыкIи псын­кIэу зэшIуахынхэу ариIуагъ.

ГъэцэкIэжьын Iофхэр рагъэ­жьэгъахэх, мазэм къыкIоцI ящэнэрэ къатым ибоксхэр ыкIи икоридорхэр агъэцэкIэжьыщтых, иммунологическэ лабораториер, операционнэ блокыр зэтырагъэпсыхьащтых. Джащ фэдэу унашъхьэмрэ шъхьаныгъупчъэхэмрэ агъэцэкIэжьыщтых. ЗэренэгуехэрэмкIэ, жъо­ныгъуакIэм сымэджэщым иIоф­шIэн ригъэжьэжьыщт.

Ащ нэмыкIэу ыпкIэ зыхэмылъ медицинэ IэпыIэгъу язытырэ сымэджэщхэмрэ поликлиник­хэмрэ тапэкIи мылъку аратыщт. Мыщ къыхеубытэх ковидыр къызэутэлIагъэхэр ыкIи ащкIэ зэгуцафэхэрэр.

Адыгеим сомэ миллиони 132,3-м ехъу джыри къыфы­хагъэкIыщт. Ащ фэгъэхьыгъэу къыIуагъ Адыгэ Республикэм ыцIэкIэ Къэралыгъо Думэм иде­путатэу, бюджетымкIэ комитетым хэтэу Владислав Резник. Мыщ къызэрэхигъэщыгъэмкIэ, шIокI зимыIэ медицинэ стра­хованием ичIыпIэ фондхэм ахъщэр аIэкIагъэхьащт.

«ОМС-м ичIыпIэ фонд хэгъэ­хъогъэным пае 2021-рэ илъэсым сомэ миллион 500 фэдиз къатIупщыгъагъ. ДжырэкIэ рес­публикэм сомэ миллиони 132-м ехъоу къыфыхагъэкIы­гъэр ОМС-м ичIыпIэ фонд хагъэхъощт, джащ фэдэу псау­ныгъэм икъэухъумэн фэгъэзэгъэ учреждениехэм игъом ковидыр къыхагъэщын алъэкIыным, Адыгеим исхэм ыпкIэ зы­хэмылъ медицинэ IэпыIэгъу ятыгъэным апэIуагъэхьащт», — къыIуагъ Владислав Резник.

Шъугу къэдгъэкIыжьын: бюджет ассигнованиехэр атегощэгъэнхэм фэгъэзэгъэ парламент Комиссиемрэ УФ-м и Правительствэрэ унашъоу зэдашIы­гъагъэм ишIуагъэкIэ панде- мием илъэхъан Адыгеим ренэу федеральнэ мылъку тедзэ къы­фыхагъэкIыгъ псауныгъэм икъэу­хъумэнкIэ учреждениехэм, медицинэм иIофышIэхэм, ыпкIэ зыхэмылъ Iэзэгъу уцхэр аIэкIэгъэхьэгъэнхэм апэIуагъэхьанэу.

«ЦIыфхэм яIэзэнхэмкIэ медицинэм иучреждениехэм яIоф­шIэн нахьышIоу зэхэщэгъэным тегъэпсыхьэгъэ IофшIэныр лъыд­гъэкIотэщт. ТапэкIэ зэшIотхын фэе зичэзыу пшъэрылъхэм ащыщых Iэзэгъу уцхэр аIэкIэгъэхьэгъэнхэр, тисымэ­джэщхэр джырэ уахътэм ди­штэрэ медицинэ Iэмэ-псымэхэмкIэ зэтегъэпсыхьэгъэнхэр. ЦIыфхэм щыIэкIэ дэгъу яIэу на­хьыбэ къагъэшIэнымкIэ —Урысые Федерацием и Пре­зиденэу Владимир Путиным къыгъэуцурэ анахь пшъэрылъ шъхьаIэхэм зыкIэ ащыщыр пхырыщыгъэнымкIэ — а пстэуми яшIуагъэ къэкIощт», — къыIуагъ Адыгэ Республикэм и ЛIышъхьэ.

АР-м и ЛIышъхьэ ипресс-къулыкъу Сурэтхэр А. Гусевым тыри­хыгъэх.