Адыгэ Республикэм и ЛIышъхьэ пшъэрылъ зэрафишIыгъэм тетэу, про­граммэу «Социальнэ газификациер» зыфиIорэр гъэцэкIэгъэным тегъэпсыхьагъэу АР-м иминистрэхэм я Кабинет 2022-рэ илъэсым мэ­лылъфэгъум и 8-м ышIыгъэ унашъоу N 77-р зытетымкIэ цIыф куп зау­лэмэ социальнэ IэпыIэгъу зэраратыщт шIыкIэр аухэсыгъ.

ЦIыф куп заулэмэ яунэ гъэстыныпхъэ шхъуантIэм пышIэгъэнымкIэ сомэ мин 50 фэдиз хъурэ зэтыгъо ахъщэ IэпыIэгъу аратынэу унашъо аштагъ. Ащ фэдэ ахъщэ IэпыIэгъур аIукIэщт:

1) Хэгъэгу зэошхом сэкъатныгъэ хэзыхыгъэхэм;

2) Хэгъэгу зэошхом хэлэжьагъэхэм;

3) Финляндием, Японием адыряIэгъэ заохэм, Хэгъэгу зэошхом ахэкIодэгъэ дзэкъу­лыкъушIэхэм яшъхьэгъусэхэм, Хэгъэгу зэошхом хэлэжьагъэхэу, сэкъатныгъэ хэзыхыгъэхэу зидунай зыхъожьыгъэхэм яшъхьэгъусэхэм;

4) ЯтIонэрэ дунэе заом илъэ­хъан концлагерьхэм, геттохэм адэсыгъэхэу зыныбжь имыкъугъагъэхэм;

5) тамыгъэу «Блокадэ ашIыгъэгъэ Ленинград дэсыгъ» зыфиIорэр, тамыгъэу «Къадзыхьэгъэ Севастополь дэсыгъ» зыфиIорэр къызыфагъэшъоша­гъэхэм;

6) 1941-рэ илъэсым мэкъуогъум и 22-м къыщегъэжьагъэу 1945-рэ илъэсым жъоныгъуакIэм и 9-м нэс мэзи 6 нахь мымакIэу тылым щылэжьагъэхэм, Хэгъэгу зэошхом илъэхъан псэемы­блэжьэу зэрэлэжьагъэхэм фэшI СССР-м иорденхэр е имедальхэр къызыфагъэшъошагъэхэм;

7) а 1-рэ, я 2-рэ купым хэхьэрэ сэкъатныгъэ зиIэхэм, кIэлэцIыкIу-сэкъатхэм;

8) урыпсэункIэ ахъщэ анахь макIэу Адыгэ Республикэм ща­гъэнэфагъэм нахьи нахь макIэу зихахъо щыт унагъохэм (цIыф шъхьэзакъохэм).

Зэтыгъо ахъщэ IэпыIэгъу къа­ратыным пае мыхэм IофшIэнымкIэ ыкIи социальнэ ухъумэнымкIэ учреждениехэм зафа­гъэзэн фае. ПэшIорыгъэшъэу къызэрэрадзагъэмкIэ, газификациемкIэ унэгъо 818-мэ IэпыIэгъу афэхъущтых. 2022 — 2024-рэ илъэсхэм мы Iофым пае сомэ миллион 40-м ехъу къыхагъэкIыщт. Адыгэ Республикэм щыпсэухэрэм гъэстыныпхъэ шхъуантIэр алъыгъэIэсыгъэнымкIэ планым унэ 6649-рэ хэт.

— ГазификациемкIэ Адыгеир лъэгэпIэшхом тет, республикэр бэшIагъэу, шIуагъэ къытэу «Газ­промым» дэлажьэ. Джыдэдэм тызпылъыр цIыфхэм яунэхэм гъэстыныпхъэ шхъуантIэр ящэлIэгъэнымкIэ УФ-м и Пре­зи­дентэу Владимир Путиным пшъэ­рылъэу къыгъэуцугъэр гъэ­цэкIэгъэныр ары. Ахэм ахэтых гъот макIэ зиIэхэу ежь-ежьырэу газ оборудование лъапIэр зыгъэуцун зымылъэкIыщтхэр. Хэгъэгум и Президент иунашъо гъэцэкIэгъэным, программэу «Социальнэ газификациер» пхы­рыщыгъэным афэшI ащ фэдэ цIыфхэм IэпыIэгъу ятыгъэнэу пшъэрылъ афэсшIыгъ», — къы­Iуагъ Адыгеим и ЛIышъхьэ.