Адыгэ Республикэм и Лъэпкъ тхылъеджапIэ Урысые Iофтхьабзэу «Тхылъхэр Донбасс IэкIэдгъэхьащтых» зыфиIорэм республикэмкIэ апэ­рэу хэлажьэхэрэм ащыщ хъугъэ. Партиеу «Единэ Россиемрэ» ащ и «Гвардие ныбжьыкIэрэ» Iофтхьабзэм кIэщакIо фэхъугъэх.

Лъэпкъ тхылъеджапIэм литературэмкIэ иотдел иIофышIэхэм тхылъ зэфэшъхьаф 300-м ехъу агъэхьазырыгъ. Ахэм ахэхьэх художественнэ, научнэ, тарихъ литературэм щыщхэр, Адыгеим икультурэ фэгъэхьыгъэхэр, Адыгэ лъэпкъ эпосэу «Нартхэм» ащыщхэри.

— Адыгэ Республикэм и Лъэпкъ тхылъеджапIэ мы Iоф­тхьабзэм гухэлъ гъэнэфагъэ иIэу хэлажьэ: Луганскэ Народнэ Республикэм и Антрацитовскэ район ит псэупIэу Дьяково итхылъеджапIэу N 27-м шIушIэ хьылъэр IэкIагъэхьащт. Советскэ Союзым и ЛIыхъужъэу, усакIоу, тхакIоу, къуаджэу Хьакурынэ­хьаблэ къыщыхъугъэ Андырхъое Хъусен Борэжъ ыкъом 1941-рэ илъэсым шэкIогъум и 8-м ащ блэнагъэ щызэрихьагъ, — къыщаIуагъ Адыгэ Республикэм культурэмкIэ и Министерствэ.

Антрацитовскэ районым ­итхылъеджапIэ ипащэу Вера Стоявам къызэрэхигъэщыгъэмкIэ, Лъэпкъ тхылъеджапIэм къа­IэкIигъэхьащт тхылъхэр ягуа­пэу аштэщтых. Лъэпкъ тхылъеджапIэмрэ Дьяково дэт тхылъеджапIэмрэ зэблэгъэныгъэ-зэ­дэлэжьэныгъэ азыфагу илъынымкIэ а Iофтхьабзэр ублапIэ хъущт.

— Партиеу «Единэ Россием» и «Гвардие ныбжьыкIэ» икъутамэу Адыгеим щыIэм ипащэу Бэрзэдж Асыет зэрязэ-гъы­гъэм тетэу Ростов имолодогвардейцэхэр къадеIэщтых тхылъхэр аIэкIагъэхьанхэмкIэ.

Адыгэ Республикэм и ­Лъэпкъ тхылъеджапIэ чIэхьэрэ пстэуми яIахь хашIыхьан алъэкIыщт а Iофтхьабзэм. 2015-рэ илъэсым ыуж къыдагъэкIыгъэ зэре­джэщтхэ тхылъхэу урысыбзэкIэ тхыгъэхэр ЛНР-мрэ ДНР-мрэ ятхылъеджапIэхэм апае партиеу «Единэ Россием» и Тхьаматэу Д. А. Медведевым иприемнэ къырахьылIэнхэ алъэ­кIыщт. Ар зыдэщыIэр: къ. Мыекъуапэ, ур. Краснооктябрьскэр, 4.