АР-м иминистрэхэм я Кабинетрэ Iахьзэхэлъ обществэу «Кор­порация Туризм.РФ» зыфиIорэмрэ зэ­дэлэжьэныгъэ зэрэзэдыряIэщтым ехьылIэгъэ зэзэгъыныгъэм тыгъуасэ Москва щыкIэтхагъэх. Шъолъыри 4-мэ япащэхэри ащ фэдэ зэ­зэгъы­ныгъэхэм акIэтхэжьыгъэх.

УФ-м и Правительствэ и Тхьаматэ игуадзэу Дмитрий Чернышенкэр зэзэгъыныгъэм икIэтхэн хэлэжьагъ. АР-м и ЛIышъхьэу КъумпIыл Муратрэ корпорациеу «Туризм.РФ» зыфиIорэм игенеральнэ директорэу Сергей Сухановымрэ до­кументым аIапэ кIадзэжьыгъ. ЗекIоным, зекIо инфраструктурэм Адыгэ Республикэм зы­щягъэу­шъомбгъугъэнымкIэ пIэлъэ кIы­хьэм телъытэгъэ зэдэ­лэжьэ­ныгъэ зэдыряIэнэу лъэныкъохэр зэзэгъыгъэх. Зыгъэ­псэфыпIэу «Лэгъонакъэ» игъэ­псын тегъэ­псыхьэгъэ проектым ипхырыщыни ахэм анаIэ зытырагъэтыщтхэм ащыщ. ГущыIэм пае, эксперт, консуль­тацие IэпыIэгъухэр зэхащэнхэу, мастер-планхэр, проект документациер агъэхьазырынхэу, инвестициехэр туризмэм халъхьанэу, зекIоным изегъэушъомбгъун тегъэ­псыхьэгъэ программэхэм япхырыщын ахэлэжьэнхэу, фэIо-фа­шIэхэр нахьышIоу агъэцэ­кIэ­нхэу ахэм рахъухьэ.

«ЗекIоныр непэкIэ шъолъыр­хэм яэкономикэ зыкъезыгъэ­Iэтыщт лъэныкъохэм ащыщ. Ама­лэу щыIэхэмрэ зекIоным зегъэушъомбгъугъэнымкIэ Урысыем и Правительствэ игъоу ылъэгъугъэхэмрэ къызфэгъэфедэгъэнхэ фае. Шъолъырхэм япащэхэр ашъхьэкIэ мы Iофыгъохэм зэрапылъхэр си-гуап. ЗекIо инфраструктурэм зегъэу­шъомбгъугъэнымкIэ Пре­зи­дентым къыгъэуцугъэ пшъэ­рылъхэр гъэцэкIагъэ хъунхэмкIэ Iоф зэрэтшIэрэм бэ елъытыгъэщтыр», — къыIуагъ Дмит­рий Чернышенкэм.

Вице-премьерым къызэ­рэ­хигъэщыгъэмкIэ, хьакIэщхэр зи­Iэхэм, хьакIэщхэр зыгъэ­псы­рэ ыкIи бэджэндэу язытырэ инвесторхэм НДС-у атырэм илъэси 5-кIэ процент тыра­мыгъэхъонэу Правительствэм унашъо ыштагъ. Президентым пшъэрылъ зэрафишIыгъэм тетэу кIэлэцIыкIу зекIо кэшбэ­кымкIэ программэр лъагъэкIуа­тэ, зыныбжь икъугъэ зекIо­хэмкIэ кэшбэкым ипрограммэ мэлылъфэгъум и 15-м нэс лъа­гъэкIотагъ. Инвесторхэм фэгъэкIотэныгъэ зиIэ чIыфэ къаIахынэу джыри амал яIэщт. Лъэпкъ проектым къыщыдэлъы­тэгъэ сомэ миллиарди 5,3-м нэмыкIэу процент ставкэм пае сомэ миллиарди 2-м ехъурэ субсидиехэр къатIупщыщтых. Джащ фэдэу шъолъырхэм гъэмафэм иублэгъум ехъулIэу но­мер мини 2,5-рэ хъурэ кемпинг, автокемпинг 50-м ехъу зэрагъэпсыщт мылъкур къа­фыхагъэкIыщт.

Корпорациеу «Туризм.РФ» зыфиIорэм игенеральнэ ди­ректорэу Сергей Сухановым зэрэхигъэунэфыкIыгъэмкIэ, шъо­лъыри 5-мэ проектхэр зэрэзэ­дагъэцэкIэщтхэм ишIуагъэкIэ 2030-рэ илъэсым ехъулIэу зе­кIохэм фэдитIукIэ къахэхъощт. 2021-рэ илъэсым зекIо миллио­ни 6 Урысыем ишъолъырхэм ащыIагъэх.

АР-м и ЛIышъхьэу КъумпIыл Мурат къызэрэхигъэщыгъэмкIэ, республикэм ихэбзэ къулыкъухэм АО-у «Корпорация Туризм. РФ» зыфиIорэм гъу­сэныгъэ пытэ дыряI, лъэпкъ проектэу «ЗекIонымрэ хьакIэхэм дахэу апэгъокIыгъэнымрэ» зыфиIорэм къыдыхэлъы­тагъэу зекIо инфраструктурэм изегъэушъомбгъун ахэр фэхьазырых.

Лъэпкъ проектым игъэцэкIэн пае корпорацием респуб­ликэм изекIо отраслэ зэдэлэ­жьэныгъэу дыриIэр нахь ыгъэпытэщт. Апэрэ чэзыоу ар зы­фэгъэхьыгъэр зыгъэпсэфыпIэу «Лэгъонакъэ» игъэпсын ары. Апэрэ чэзыум къыдыхэлъытагъэу лыжэкIэ къызщачъыхьэрэ гъогу километрэ 20, номер 650-рэ зыхэт хьакIэщхэр агъэ­псыгъэх. Илъэс къэс хьакIэ мин 500-м нэс курортым къэкIон ылъэкIыщт. Рес­публикэм къэкIорэ зекIохэм япроцент 74-мэ Лэгъо-Накъэ зэрагъэлъэгъу.

Дмитрий Чернышенкэм зэрэхигъэунэфыкIыгъэмкIэ, зекIоным зиушъомбгъунымкIэ ищыкIэгъэ пстэур Адыгеим иI. Шъо­лъырым социальнэ-экономикэ хэхъоныгъэ зэришIыщт Стратегием мы отраслэм чIыпIэшхо щеубыты. УФ-м и

Правительствэ яIэпыIэгъоу зекIо инфраструктурэм къушъхьэлъэ чIыпIэ­хэм зыщарагъэушъомбгъу. Гъэ­рекIо зекIо мин 500 фэдиз республикэм щыIагъ. АР-м и ЛIышъхьэ ишIошIкIэ, корпорациеу «Туризм.РФ» зыфиIорэм зэдэлэжьэныгъэ зэрэдыряIэм ишIуагъэкIэ зекIохэм япчъагъэ лъэшэу къыхэхъощт.

«ЗекIоным зегъэушъомбгъугъэнымкIэ, проектэу «Лэгъонакъэм» ипхырыщынкIэ амалэу тиIэр зэкIэ къызфэдгъэфедэн фае. Ащ зекIоным хэ­хъоныгъэ ригъэшIыщт, респуб­ликэм иэкономикэ зэхъокIы­ныгъэ фишIыщт. Корпорациеу «Туризм.РФ» зыфиIорэм ды­тиIэ зэдэлэжьэныгъэм ишIуа­гъэкIэ зекIо инфраструктурэм изегъэушъомбгъункIэ пшъэры­лъэу тиIэхэр нахь шIуагъэ къы­тэу зэшIотхынхэу сэгугъэ. Тэ ыпэкIэ тылъыкIотэн, чIыопсымрэ тятэжъхэм шIоу къытфа­гъэнагъэмрэ къыткIэхъухьащтхэм къафэтыухъумэн фае», — къыIуагъ КъумпIыл Мурат. АР-м и ЛIышъхьэ УФ-м и Правительствэ и Тхьаматэ игуа­дзэу Дмитрий Чернышенкэм «тхьауегъэпсэу» риIуагъ рес­публикэм ренэу ынаIэ къызэ­рэтыригъэтырэм фэшI. АР-м и ЛIышъхьэ ипресс-къулыкъу