Сотовэ зэпхыныгъэр ыкIи интернет амалхэр къызфа­гъэ­федэхэзэ гъэпцIагъэ зыхэлъ бзэджэшIагъэу зэрахьэхэрэм япчъагъэ мы аужырэ уахътэм хэпшIыкIэу хэхъуагъ.

ХэбзэухъумакIохэм пэшIорыгъэшъ Iофтхьабзэхэр зэрахьэхэми, цIыфхэм зэдэгущыIэгъухэр адашIыхэми, ахэр бэрэ агъэделэх, ямылъкуи чIанэ.

ГъэпцIагъэ зыхэлъ шIыкIэу бзэджашIэхэм къызфагъэфедэрэр зэтефыгъэу щыт. Ахэр зэкIэ зэзыпхыхэрэр цIыфхэм егъэ­лыегъащэу бзэджашIэхэм цыхьэ зэрафашIырэр ары. Мыщ фэдэ бзэджэшIа­гъэхэр къычIэбгъэщын­хэмкIэ къин, сыда пIомэ бзэджашIэм ынэгу цIыфым ылъэгъурэп.

Мы тхьамафэр къызи­хьагъэм къыщегъэжьагъэу бзэджашIэхэм пэIудзыгъэ шIыкIэм иамалхэр къызфагъэфедэзэ Адыгеим щыпсэурэ нэбгыритIу агъэп­цIагъ. Зэрарыр сомэ мин шъитфым ехъу.

Тэхъутэмыкъое районым щыпсэурэ бзылъ­фыгъэм ымышIэрэ ыкIи ымылъэгъурэ цIыфхэм цыхьэ афишIи ахъщэшхо чIинагъ. Мыщ епхыгъэу уголовнэ Iоф къызэIуа­хыгъ. Джащ фэдэу рес­пуб­ликэм икъэлэ шъхьаIэ щыщ бзылъфыгъэм сомэ мин 40 шIуатыгъугъ.

Непэ бзэджашIэхэм шIыкIэ зэфэшъхьафхэр къагъотых цIыфхэр агъэ­пцIэнхэм пае. ГущыIэм пае, «Ваша банковская карта заблокирована» зэ­рытхэгъэ СМС-хэр бэхэм афагъэхьых. ТелефонкIэ зафытеохэкIэ, щынэгъончъэнымкIэ банкым икъулыкъу иIофышIэхэу араIо ыкIи банкым икартэу цIы­фым ыгъэфедэрэм кIуачIэ имыIэжьэу макъэ рагъэIу. Мы гумэкIыгъор дэгъэзыжьыгъэным фэшI картэм ыкIыб пчъэгъищ хъурэ кодэу тетхагъэр къараIон фаеу цIыфым гурагъаIо. СМС шIыкIэм тет мэкъэгъэIур банкым къыфигъэхьыгъэу бэмэ къащэхъу ыкIи кодыр бзэ­джашIэхэм араIо. Нэ­ужым яахъщэу счетым илъыр зэкIэ бзэджашIэхэм рахы.

Мыщ фэдэ гумэкIыгъо шъухэмыфэным фэшI къышъуаIорэр зэкIэ шъу­шIошъ шъумыгъэхъу. Бан­кым къышъуитыгъэ картэм иреквизитхэр, ПИН-­кодыр, паролыр, джащ фэдэу картэм ыкIыб тетхэгъэ пчъагъэхэр зыми ешъумыIох.