Дунэе авиацием, космонавтикэм я Мафэ машинэхэр зэхэтыхэу Мыекъуапэ иурамхэм къарыкIуагъэх.

Урысые Федерацием и УIэшыгъэ КIуачIэхэм, Ошъогу-космическэ кIуа­чIэхэм Донецкэ ыкIи Луганскэ народнэ респуб­ликэхэм хэушъхьафыкIыгъэ дзэ операциеу агъэцакIэрэм зэхахьэм хэла­жьэхэрэм зэрадырагъа­штэрэр Iофтхьабзэм къыщыхэщыгъ.

Адыгэ Республикэм и Къэралыгъо филармоние ыпашъхьэ зэхахьэм хэла­жьэхэрэр щызэIукIагъэх. Машинэ 20 зэхэтэу Мые­къуапэ иурамхэм къарыкIуагъэх. ТекIоныгъэм, Урысыем, Адыгеим якъэралыгъо быракъхэр машинэхэм ахэшIагъэхэу агъэбыбатэхэзэ, Мые­къуапэ иурам шъхьаIэхэм машинэхэр къары­кIуагъэх. Къалэм щыпсэу­хэрэр, хьакIэу къэкIуагъэ­хэр Iэгу къафытеохэзэ, мамыр зехьэхэм Iоф­тхьабзэр рагъэкIокIыгъ.

Мыекъуапэ итемыр лъэ­ныкъокIэ щыIэ зэхэт саугъэтхэм якIолIагъэх, лIы­хъу­жъэу фэхыгъэхэм шъхьа­щэ афашIыгъ. «Егъэ­шIэрэ машIом» къэгъагъэ­хэр кIэлъыралъхьагъэх.

Адыгэ Республикэм и Правительствэ, Мые­къуапэ иадминистрацие, ДОСААФ-м якъулыкъу­шIэ­хэр, ветеран организа­циехэм, нэмыкIхэм ахэтхэр зэхахьэм хэлэжьагъэх.

— Советскэ офицерэу Юрий Гагариныр космосым зэкIэми апэу зыбыбыгъэ мафэр хэдгъэунэфыкIызэ, тизэкъотныгъэ нахь мэпытэ. Украинэм хэушъхьафыкIыгъэ дзэ операциеу щыкIорэм хэлэжьэрэ тиофицерхэм, дзэкIолIхэм тыгукIэ та­зэ­рэготыр ядгъашIэ тшIоигъу, — къыIуагъ Мые­къопэ дзэ-патриотическэ клу­бэу «Новобранцэм» ипащэу Владислав Новарчук. — Космонавтикэм и Мафэ хэдгъэунэфыкIызэ, летчикэу къулыкъур зы­хьыхэрэм зэрадедгъа­штэрэр къыхэтэгъэщы.

НыбжьыкIэхэм япатриотическэ, интернациональнэ пIуныгъэ фэгъэзэгъэ В. Стасевым къы­ти­Iуагъ кIэлэеджакIохэр, ар­мейцэ цIыкIухэр космонавтикэм и Мафэ ихэ­гъэу­нэфыкIын хэлажьэ­хэзэ, тарихъым инэкIубгъо­хэр нахьышIоу зэра­гъэшIэнхэм зэрэпылъхэр.

ЧIыпIэ «плъырхэм» дзэ къулыкъур ащызыхьыгъэу Р. Ниязовыр ныбжьыкIэ­хэм гущыIэгъу афэхъугъ. Мамыр щыIакIэм игъэпы­тэн зэкIэми зэдыряIофэу зэрэщытыр ащ къыIуагъ.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет итхьаматэ игуадзэу Константин Щербаковыр, Мые­къуапэ иадминистрацие ипащэ игуадзэу Юрий Томчак лъэпкъ зэфэшъхьафхэр зэIукIэгъум зэ­рэхэлажьэхэрэм мэхьэнэ ин ратыгъ. УIэшыгъэ КIуа­чIэхэм яветеранхэр, ныбжьыкIэхэр гущыIэгъу зэ­фэхъугъэх, зэхэтхэу нэпэеплъ сурэтхэр атыра­хыгъэх. ЛIэужхэм язэпхыныгъэхэр зыгъэпытэрэ зэхахьэр гум шIукIэ къи­нэжьынэу кIуагъэ.

Сахьидэкъо Нурбый.