Санкциехэм апкъ къикIэу IофшIэнымкIэ бэдзэршIыпIэм IэпыIэгъу еты­гъэным фытегъэпсыхьэгъэ Iофтхьабзэхэм апэIуагъэхьанэу шъолъыр­хэм бюджет ассигнование тедзэхэр аIэкIэгъэхьэгъэнхэм фэгъэхьыгъэ унашъор Урысые Федерацием и Правительствэ ыухэсыгъ. УФ-м и Правительствэ иIэпэчIэгъэнэ фонд ахъщэр къыхагъэкIыщт.

Адыгэ Республикэм къы­Iэ­кIэхьащт сомэ миллион 62-рэ мин 868,7-р зыпэIуагъэхьащтыр IофшIэнымкIэ бэдзэр­шIыпIэм илъ хъугъэ гумэкIыгъом къыкIегъэчыгъэнымкIэ Iоф­тхьэбзэ тедзэхэр пхырыщыгъэнхэр ары. Ащ нэмыкIэу сомэ миллион 19-рэ мин 346,8-р зыпэIуагъэхьащтыр промыш­леннэ предприятиехэм яIофы­шIэхэу къыIуагъэкIынхэм ищынагъо къызшъхьащыхьагъэхэм сэнэхьат тедзэ ягъэгъотыгъэнымкIэ Iофыгъохэм язэшIохын.

Адыгеим ахъщэ IэпыIэгъу къыфыхэгъэкIыгъэным фэгъэ­хьыгъэ унашъо зыштагъэр Урысые Федерацием и Правительств ары. Урысые Феде­рацием и Федеральнэ ЗэIукIэ и Комиссие ыпэкIэ ар игъоу ылъэгъугъ, Адыгеим ыцIэкIэ Къэралыгъо Думэм идепутатэу, бюджетымкIэ ыкIи хэбзэ­IахьхэмкIэ Къэралыгъо Думэм икомитет хэтэу Владислав Резники ар пхырыгъэкIыгъэным дэлэжьагъ.

Адыгеим и ЛIышъхьэ къызэрэхигъэщыгъэмкIэ, IофшIэн мыгъотыныгъэм ылъэныкъокIэ Iофхэр нахьышIу мэхъух, 2021-рэ илъэсым щылэ мазэм и 1-м ехъулIэу IофшIэн зымыгъоты­хэрэр проценти 5,2-рэ хъущтыгъэмэ, 2022-рэ илъэсым гъэтхапэм и 22-м ехъулIэу процент 0,8-м нэсэу ар къеIыхыгъ. Санкциехэм ялъэхъан гумэкIыгъоу къэуцугъэр зэпхыгъэхэм ащыщ IэкIыб къэралхэр зы­хэлэжьэхэрэ организациехэм яIофшIэн къы­зэтеуцон зэрилъэ­кIыщтыр. Рес­публикэм ащ фэдэ организациеу итыр бэп.

«IофшIэнымкIэ бэдзэршIыпIэм изытет ренэу тылъэплъэ. IофшIэн зымыгъотыхэрэм япчъа­гъэ хэмыхъонымкIэ анахь шIуа­гъэ къэзытырэ Iофтхьабзэхэм ащыщ предпринимательствэм IэпыIэгъу етыгъэныр. Ащ нэ­мыкIэу Адыгэ Республикэм щыпсэурэ цIыфхэм IофшIэн ягъэгъотыгъэнымкIэ къэралыгъо къулыкъум и ГъэIорышIапIэ фэгъэзэгъэ программэ зау­лэ зэшIотэхы, ахъщэу респуб­ликэм къыфатIупщыгъэри ащ пэIудгъэхьащт», — къыхигъэ­щыгъ КъумпIыл Мурат.

Шъугу къэтэгъэкIыжьы: Адыгеим и ЛIышъхьэ пшъэрылъ афишIыгъ IофшIэн зымыгъотыхэрэм зэрищыкIагъэм тетэу афэгумэкIыгъэнымкIэ, IофшIапIэхэм ахэр аIугъэхьэгъэнхэмкIэ нахь загъэчанынэу, республикэм ипредприятиехэу чIыпIэ нэкIхэр зиIэхэм Iоф ащашIэшъуным тегъэпсыхьэгъэ сэнэхьат тедзэ­хэр арагъэгъотынхэу, федеральнэ гупчэм къытырэ IэпыIэгъур икъоу къызфагъэфедэнэу.

Депутатэу Владислав Резник къызэриIуагъэмкIэ, гумэкIыгъоу щыIэхэм къакIегъэчыгъэнымкIэ УФ-м и Правительствэ къыгъэ­хьазырыгъэ Iофтхьабзэхэм ар язы Iахь ныIэп ыкIи бюджет мылъкур атегощэгъэным фэгъэ­зэгъэ Комиссиеу парламентым щыIэм ащ диштэрэ Iофтхьа­бзэхэр игъоу ылъэгъугъэх.

«Мыщ фэдэ гумэкIыгъо лъэ­хъаным, санкциехэр нахьыбэ зыщыхъухэрэм, тицIыфхэм Iэпы­Iэгъу тафэхъуным мэхьанэшхо иIэу щыт. Адыгеим ипащэ­хэр тигъусэхэу тапэкIи тынаIэ зытедгъэтыщтыр чIыпIэ зэжъу ифэ­гъэ цIыфхэм ищыкIэгъэ IэпыIэгъур игъом зэралъыдгъэ­Iэсыщтыр ары», — къыIуагъ Вла­дислав Резник. АР-м и ЛIышъхьэ ипресс-къулыкъу