Лъэпкъ проектэу «Псауныгъ» зыфиIорэм къыдыхэлъытэгъэ Iофтхьа­бзэ­хэр Адыгеим щылъагъэкIуатэх.

Ащ епхыгъэу, мэлылъфэгъум и 6-м Адыгэ рес­публикэ клиническэ сымэ­джэщым эндоскопиемкIэ иотделение щызэхащэгъэ мастер-классым операции 4 къыхиубытагъ.

Ахэм ащыщэу 2-р апэ­рэу тишъолъыр щашIыгъэх, адри 2-р (зэз ры­кIуапIэхэр стентирование шIы­гъэнхэр) 2021-рэ илъэ­сым ибэдзэогъу мазэ къыще­гъэжьагъэу отделением иврачхэм рагъэ­кIокIых.

Мастер-классыр зэха­щагъ Краснодар клиническэ сымэджэщым эндо­скопиемкIэ иотделение ипащэу М. И. Быковамрэ эндоскопическэ оборудованиер къыдэзыгъэкIыгъэ фирмэм илIыкIоу О.А. Щип­ковамрэ.

Фирмэу «Boston Scientific» зыфиIорэм къаритыгъэ обо­рудованием ыкIи эндоскопическэ Iэмэ-псы­мэм яшIуагъэкIэ Адыгэ РеспубликэмкIэ зыфэдэ къэмыхъугъэ операциехэр ашIыгъэх.

— Зыфэдэ къэмыхъугъэ операциехэм ямэхьанэр цIыфым ежь физиологи­ческэ гъуанэу иIэхэмкIэ арыхьэхэзэ ыкIи ныбэр зэIамыгъэчъэу (малоинвазивно) зэз рыкIуапIэхэм яуз хьылъэхэм яIэзэнхэр ары. Джащ фэдэу мыщ фэдэ операциехэм фы­къоныгъэу хахырэр бэкIэ нахь макI, псынкIэу мэ­хъужьых ыкIи цIыфым ипсауныгъэ изытет на­хьы­шIу ашIы, — щыхагъэу­нэфыкIы АР-м псауныгъэр къэухъумэгъэнымкIэ иминистерствэ.