Общественнэ чIыпIэхэр зэтырагъэпсыхьэх
Федеральнэ проектэу «Объясняем.рф-м» къыдыхэлъытагъэу зэдэгущыIэгъур «VK.com» зыфиIорэм къихьагъ.
ЦIыфхэр зыгъэгумэкIырэ упчIэхэр Къэралыгъо фэIо-фашIэхэм япортал къырагъэхьыгъэх. Ахэр анахьэу зыфэгъэхьыгъэр общественнэ чIыпIэхэм ыкIи щагухэм язэтегъэпсыхьан ары.
— Фэтэрыбэу зэхэт унэхэм ачIэс нэбгырэ пэпчъ муниципальнэ образованием иадминистрацие лъэIу тхылъкIэ зыфигъэзэн ылъэкIыщт. Мыщ фэдэ унэхэм къызэлъаубытырэ щагухэм язэтегъэпсыхьан заявкэу къатыгъэхэм ячэзыу елъытыгъэу къыхахых. IофшIэнхэр рамыгъажьэхэзэ, дизайн-проектхэр агъэхьазырых ыкIи унэм щыпсэухэрэм зэдаштэнэу арагъэлъэгъух. Ахэм зэхъокIыныгъэхэр ыкIи хэгъэхъожьынхэр цIыфхэм афашIын амал яI, — къыIуагъ министрэм игуадзэ.
Общественнэ чIыпIэу зэтырагъэпсыхьащтхэм якъыхэхын республикэм щыпсэухэрэр хэлажьэх.
— ПсэупIэхэу нэбгырэ мин 20-м нахьыбэ зыщыпсэухэрэм илъэс къэс мэкъэтынкIэ общественнэ чIыпIэу зэтырагъэпсыхьащтхэр къыхахы. Ащ фэдэ муниципальнэ образованиехэу Адыгеим итхэр «Къалэу Мыекъуапэ» ыкIи «Яблоновскэ къэлэ псэупIэр». Нэбгырэ мин 20-м нахь макIэ зыщыпсэухэрэм яобщественнэ чIыпIэу зэтырагъэпсыхьащтхэр ежь муниципалитетым иобщественнэ комиссие къыхехы, — хигъэунэфыкIыгъ Лев Каракян.
Шъугу къэдгъэкIыжьын, общественнэ чIыпIэхэм язэтегъэпсыхьанкIэ мэкъэтыным Адыгеим щыпсэхэурэр хэлэжьэнхэ фит. ЗыкI федеральнэ платформэу «http://za.gorodsreda.ru» зыфиIорэм мэлылъфэгъум и 15 — 30-м онлайн шIыкIэм тетэу амакъэ щатын алъэкIыщт.
Мы илъэсым пстэумкIи общественнэ чIыпIэ 12 ыкIи щагу 30 Адыгеим щызэтырагъэпсыхьащт. Шъолъыр проектым сомэ миллиони 136,3-рэ пэIуагъэхьащт. Ар бюджет зэфэшъхьафхэм къахагъэкIыщт.