Адыгеим и ЛIышъхьэу КъумпIыл Мурат тхьамэтагъор щызэрихьэзэ Си­туационнэ гупчэм щыкIогъэ зэIукIэр зыфэгъэхьыгъагъэр 2021-рэ илъэсымкIэ Адыгэ Республикэм и Гъогу фонд икъэкIуапIэхэр зэрагъэ­федэщтхэр ыкIи 2022-рэ илъэсымкIэ гъогу хъызмэтым ылъэныкъокIэ пшъэрылъхэр гъэнэфэгъэнхэр ары.

Мы Iофтхьабзэм хэлэжьагъэх Адыгэ Республикэм и Премь­ер-министрэ ипшъэрылъхэр зы­гъэцакIэу КIэрэщэ Анзаур, финансхэмкIэ министрэу Виктор Орловыр, псэолъэшIынымкIэ, транспортымкIэ, ЖК-мкIэ ыкIи гъогу хъызмэтымкIэ иминистрэу Валерий Картамышевыр, Мые­къуапэ имэрэу Геннадий Митрофановыр, Адыгэ Респуб­ликэм псэолъэшIынымкIэ и Ми­нистерствэ къыфэгъэзэгъэ учреждениехэм ялIыкIохэр.

ЗэIукIэр къызэIуихызэ Адыге­им и ЛIышъхьэ къызэрэхигъэщыгъэмкIэ, гъогухэр щынэгъончъэу щытынхэмкIэ республикэм пшъэрылъ инхэр щызэ­шIуахых. Автомобиль гъогухэм яшIынкIэ ыкIи ягъэцэкIэжьынкIэ Iофтхьабзэхэр зэкIэ дэгъоу зэхэщэгъэнхэ фае.

«Республикэм ихэхъоныгъэкIэ анахь мэхьанэ зиIэхэм ащыщ гъогу дэгъухэр тиIэнхэр. Адыге­им щыпсэухэрэми, хьакIэу къа­кIохэрэми, джащ фэдэу эко­номикэмкIэ предприятиехэм, зекIонымкIэ, АПК-мкIэ ащ фэдэ щынэгъончъэ гъогу дэгъухэр ящыкIагъэх. Мы лъэныкъомкIэ Iофышхо зэшIотхыгъ, ау ащ тыкъыщыуцу хъущтэп. псэолъа­кIэхэр итхъухьэхэ зыхъукIэ цIыфхэм яфэныкъоныгъэхэм, транспортэу гъогухэм арыкIорэм ибагъэ гъунэ алъытфын, гъогу зэхэкIыпIэхэр къэухъу­мэгъэнхэм, ахэм язытет лъыплъэгъэным тынаIэ атетымыгъэт хъущтэп. Лъэпкъ проектхэм яшIуагъэкIэ гъогухэм яшIынрэ ягъэцэкIэжьынрэ къыдалъытэрэ пшъэрылъхэр икъоу зэшIотымыхыхэ хъущтэп», къыхигъэ­щыгъ КъумпIыл Мурат.

Адыгэ Республикэм псэо­лъэшIынымкIэ, транспортымкIэ, ЖК-мкIэ ыкIи гъогу хъызмэтымкIэ иминистрэу Валерий Картамышевым проектхэу гъэцэ­кIагъэ хъугъэхэм афэгъэхьыгъэу къыIотагъ. Адыгэ Респуб­ликэм 2021-рэ илъэсымкIэ и Гъогу фонд сомэ миллиарди 8,6-рэ фэдизыгъ, ащ щыщэу сомэ миллиарди 6,2-р федеральнэ бюджетым, сомэ миллиарди 2,4-р республикэ бюджетым къахэкIыгъэх.

Мылъкур субсидие фэдэу муниципальнэ образованиехэм аIэкIагъэхьагъ гъогухэм япхыгъэ IофшIэныр зэшIуахыным, лъэпкъ проектэу «Щы­нэгъончъэу щыт гъогу дэгъухэр» зыфиIорэр гъэцэкIэгъэным, гъогухэр гъэцэкIэжьы­гъэнхэм, тротуархэр шIыгъэнхэм, видеофиксациер щыIэным апае.

ЗэрэхагъэунэфыгъэмкIэ, 2021-рэ илъэсым республикэм лъэпкъ проектэу «Щынэ­гъончъэу щыт гъогу дэгъухэр» зыфиIорэм къыдилъытэрэ Iоф­тхьабзэхэр аухыгъэх, 2023-рэ илъэсым иплан хэхьэрэ Iоф­шIэнхэр аублагъэх.

Мы илъэсым пэшIорыгъэшъэу къызэрэрадзагъэмкIэ, рес­публикэм и Гъогу фонд сомэ миллиарди 5,3-рэ фэдиз хъущт, ащ щыщэу сомэ миллиарди 2,2-р — федеральнэ, миллиарди 3,1-р – республикэ бюджетым къахэкIыщт.

Адыгеим икъэлэ шъхьаIэ игъогухэм язытет фэгъэхьыгъэ зэфэхьысыжьыр Мыекъуапэ имэрэу Геннадий Митрофа­новым къышIыгъ. Ащ зэрэхи­гъэунэфыкIыгъэмкIэ, муниципалитетым игъогу хъызмэт илъэсэу икIыгъэм бюджет зэфэшъхьафхэм къахэкIыгъэу сомэ миллион 530-м ехъу пэIухьагъ.

Мы илъэсым Мыекъуапэ ­ыкIи ащ къыпэIулъ псэупIэхэм ­лъэпкъ проектым къызэрэди­лъытэрэм тетэу зэхэубытагъэу километри 6,58-рэ зикIыхьэгъэ гъогу Iахьи 5 ащагъэцэкIэ­жьыщт, ахэм сомэ миллион 200-м ехъу апэIухьащт. АР-м и ЛIы­шъхьэ пшъэрылъ зэрафишIыгъэм тетэу зэпахырэ узхэм зы­щяIазэхэрэ сымэджэщым дэжь гъогу инфраструктурэм зыщырагъэу­шъомбгъу, тапэкIэ са­быибэ зиIэ унагъохэм чIыгухэр ащ щаратыгъагъэх.

ЗэIукIэм джащ фэдэу щатегущыIагъэх республикэм игъогухэм язытет нахьышIу шIыгъэ­нымкIэ Iофыгъо заулэхэм. Ведомствэхэм ыкIи чIыпIэхэм япащэхэм пшъэрылъхэр афа­шIыгъэх.

АР-м и ЛIышъхьэ ипресс-къулыкъу