БлэкIыгъэ гъэтхэпэ мазэм гъомылапхъэхэм ауасэ, зэрэдунаеу пштэмэ, про­цент 12,6-кIэ дэкIоягъ.

ООН-м къызэритырэмкIэ, лэжьыгъэхэмрэ да­гъэмрэ анахьэу къэлъэпIагъэхэр. ГущыIэм пае, коцым ыуасэ процент 19,7-рэ хэхъуагъ, былым Iус ашIыхэрэм ауасэ процент 20,4-кIэ дэкIоягъ. Джащ фэдэу дагъэр процент 23,2-кIэ гъэтхэпэ мазэм нахь лъапIэ хъугъэ. Анахьэу тыгъэгъазэм хэшIыкIыгъэр ары зыуасэ къаIэтыгъэр. Ар къызэлъапIэм, нэмыкI дэгъэ лъэпкъхэр нахьыбэу ащэфы хъугъэ. Ащ ыпкъ къикIэу ахэм ауаси дэ­кIоягъ.

— Хэхъоныгъэ инхэр зиIэ къэралыгъохэм экономическэ, энергетическэ ыкIи гъомылэпхъэшIын политикэм хэукъоныгъэу щашIыгъэхэм апкъ къи- кIыкIэ илъэситIукIэ узэкIэ­Iэ­бэжьмэ ары уасэхэр зыдэкIоягъэхэр. Аужырэ тхьа­мафэхэм Iофхэр джыри нахь дэи хъугъэх, — къыIуагъ Владимир Пу­тиным иеплъыкIэхэр къыриIотыкIызэ.

— Арэу щытми, дунэе уасэхэм анахьи Урысыем уасэу илъхэр нахь мэкIэнхэу амал тиI. Гъомылэпхъэ куп анахь шъхьаIэхэм ахахьэхэрэр тихъызмэтшIапIэхэм къыдагъэкIых, хэгъэгу кIоцI бэдзэршIыпIэр ахэмкIэ ушъагъэ. Ащ джыри нахь зегъэушъом­бгъугъэн, мэкъумэщ ыкIи пцэжъыехъун хъызмэтшIапIэхэр IэкIыбым къыща­щэфыщтым лъэшэу зэрепхыгъэхэм къыщыгъэкIэ­гъэн фае.

Ащ къыпкъырыкIызэ, мэкъумэщ хъызмэтым халъхьанэу сомэ миллиарди 153-м къыщымыкIэу агъэнэфэнэу, IэкIыб къэралхэм къащащэфыщтыр нахь макIэ шIыгъэным пае, чылэпхъэ лъэпкъыкIэхэм якъыхэхын пылъ гупчэхэм сомэ миллиарди 5-м къыщымыкIэу афэтIупщыгъэнэу Президентым Правительствэм пшъэрылъ фишIыгъ.

Ахэм ямызакъоу, мэ­къумэщ техникэу Урысыем къыщыдагъэкIырэм хагъэ­хъонэу гухэлъ яI. УФ-м и Премьер-министрэ игуа­дзэу Виктория Абрамчен­кэм къызэриIуагъэмкIэ, проценти 3-кIэ ар нахьыбэ ашIынэу, инвестицие проектэу щыIэхэм япхырыщынкIэ IэпыIэгъу хъунхэу, проектыкIэхэри агъэпсынхэу пшъэрылъ зыфагъэуцужьыгъ.

Мэлылъфэгъу мазэм ыкIэм нэс гъомылапхъэхэм ауасэ дунаими, тихэгъэгуи къащеIыхыжьыным игугъа­пIэ щыIэу специалистхэм къаIо. Хэгъэгу кIоцI бэдзэр­шIыпIэр пштэмэ, сомэм ыуасэ зэрэпытагъэм ишIуа­гъэ къэкIощтэу ары зэра­лъытэрэр. Сомэ миллиарди 150-м ехъу мэкъу-мэщым къэралыгъом зыхилъхьэкIэ ишIогъэшхо къызэ­рэкIощтыми къыкIагъэтхъы.

Анахьыбэу гугъапIэхэр зэрапхыхэрэр мэкъумэщ бизнесыр ары. 1998-рэ илъэсым гъомылэпхъэшIыным пылъхэм ящыкIагъэр IэкIыбым къыращын амал ямыIэжьэу къызэнэхэм, уахътэм диштэу яIофшIэн зэрэзэрахъокIышъугъа- гъэр, къыкIэлъыкIогъэ 1999-м хэпшIыкIэу мэкъу­мэщ отраслэм зэрэхэхъуа­гъэр щысэу къахьы.