«Единэ Россием» ипроекткIэ
ИкIыгъэ илъэсым къыщегъэжьагъэу хабзэм къэралыгъо IэпыIэгъур нахь ыгъэлъэшыгъ. Ащ ишIуагъэкIэ 2021-рэ илъэсым хэгъэгум кIэлэцIыкIу IыгъыпIэ 324-рэ кIэу щашIыгъ.
Ахэм сабый мин 50-мэ чIыпIэ ащагъотыгъ. ЕджапIэхэм ягъэцэкIэжьынкIэ программэм Iоф ышIэу ригъэжьагъ, проектым хэтэу автобус мини 4 ащэфыгъ.
— Тихэгъэгу ичIыпIабэхэм сащыIагъ — Алтай крайми, Чэчэн Республикэми, Томскэ хэкуми, Тыва — тыдэ сызыщэIи ны-тыхэу сызыIукIагъэхэм къаIуагъ ахэр еджэпIакIэхэм ыкIи кIэлэцIыкIу IыгъыпIакIэхэм къызэряжэхэрэр.
ИкIыгъэ илъэсым кIэлэцIыкIу IыгъыпIэ 324-рэ къызэрэзэIутхыгъэр пчъэгъэ къодыеу щытэп, ащ ыкIыб дэт унэгъо мин пчъагъэу чэзыум хэтыгъэхэм ясабыйхэм чIыпIэхэр зэрагъотыгъэхэр, — къыщиIуагъ Къэралыгъо Думэм изэхэсыгъо УФ-м и Премьер-министрэу Михаил Мишустиным. — Ащ нэмыкIэу еджапIэхэм ягъэкIэжьын дакIоу псэуалъэу жъы хъугъэхэр зэблахъущтых.
— Адыгеим мы проектым гугъэшхохэр щырапхых ыкIи пащэхэм янэплъэгъу ар рагъэкIырэп. ИкIыгъэ тхьамафэм Адыгеим и ЛIышъхьэ ядэIугъ IофшIагъэу щыIэхэм язэфэхьысыжьхэм. Ахэр афэгъэхьыгъагъэх псэолъэшIынымкIэ ыкIи социальнэ объектхэм ягъэцэкIэжьынкIэ Iофэу ашIэрэм, поселкэу Инэм поликлиникэ кIэу щышIыгъэным ыкIи Тэхъутэмыкъое районым еджэпIищ щыгъэпсыгъэным. ЛIышъхьэм анахьэу ынаIэ зытетыгъэр еджапIэхэм ягъэцэкIэжьын. Мыгъэ республикэм «Единэ Россием» ипроекткIэ еджэпIи 9 щагъэцэкIэжьыщт. А IофшIэныр лъэкIуатэ, ау ащ дакIоу къэкIорэ илъэсым агъэцэкIэжьыщтхэр къыхахых.