Мэлылъфэгъум и 9-м Мыекъопэ къэралыгъо технологи­ческэ университетым ипчъэхэр мыгъэ еджапIэм къычIахьэ зышIоигъохэм къафызэIуихыгъагъэх. Ар шэн-хабзэ еджа­пIэм щыхъугъэу илъэс къэс кIэлэеджакIохэр, ахэм янэ-ятэхэр къырегъэблагъэх.

ЗэIукIэгъум хэлажьэх университетым ипащэ, деканхэр, кIэлэегъаджэхэр, студентхэр. Iофтхьабзэр ректорэу Къуижъ Саидэ пэублэ гущыIэкIэ къызэIуихыгъ, ныбжьыкIэу еджапIэм къычIахьэхэмэ зышIоигъохэм шъхьафэу закъыфигъэ­загъ, сэнэхьатыр тэрэзэу къыхахынымкIэ непэрэ зэIукIэгъум ишIуагъэ къэ­кIонэу зэрэгугъэрэр къыIуагъ.

ЕджапIэм чIэхьанхэмкIэ 2022-рэ илъэ­сым кIэу къыхэхьагъэхэм нэIуасэ ныбжьыкIэхэр афишIыгъэх тхылъхэр аIы­хыгъэнымкIэ комиссием пшъэдэкIыжь зы­хьырэ исекретарэу Бэрзэдж Розэ. КIэлэеджакIохэм яупчIэхэр лъэныкъо зэфэшъхьафхэм афэгъэхьыгъагъэх. ГущыIэм пае, чIахьэхэ зыхъукIэ экзаменэу атыщтхэм, апшъэрэ еджапIэм къытырэ сэнэхьатхэм, къычIэкIыхэрэм Iоф зыщашIэн алъэкIыщтым, стипендиехэм ыкIи нэмыкIхэм.

ЕтIанэ едэIугъэх егъэджэн IофшIэнымкIэ проректорэу Людмила Задо­рожнаям. ЧIэхьащтхэм ялъэIу тхылъхэр университетым зэриштэхэрэр, стипендиеу студентхэм къахьын алъэкIыщтхэм проректорыр къатегущыIагъ. ГущыIэм пае, нахь стипендиешхо студентым къы­ратынымкIэ амал пчъагъэ зэрэщыIэр къафиIотагъ. Ащ фэдэу студентым зыхэгъэхъогъэ стипендиеу дэгъу дэдэу зэ­ре­джэрэм ыкIи гъэхъагъэхэр научнэ, общественнэ, спортивнэ, культурнэ, твор­­ческэ щыIакIэм зэращыриIэхэм апае къыратырэм къыщегъэжьагъэу УФ-м и Правительствэ истипендие нэсэу къы­лэжьын ылъэкIыщт.

НыбжьыкIэ политикэмкIэ проректорэу БрантIэ Мурат къафиIотагъ еджапIэм истуденческэ объединениехэм Iоф зэрашIэрэр ыкIи дэгъоу уеджэщтмэ, творчествэм упылъыщтмэ университетым амал дэгъухэр зэриIэхэр.

Анахь къахэщырэ хъугъэ-шIагъэу хъу­гъэ факультетхэр зэкIэ зыхэлэжьэгъэхэ къэгъэлъэгъоныр. Ар къыгъэхьазырыгъ профориентациемкIэ Гупчэм ипащэу Олег Франко. Iофтхьабзэм «парадкIэ» еджагъэх. Ащ узыIэпищэу сэнэхьатхэм якъэбар къыщаIотагъ, университетым ущеджэныр зэрэгъэшIэгъоныр къагъэлъэгъуагъ.

Ащ ыуж университетым ихьакIэхэр факультетхэм нэIуасэ афашIыгъэх, сэнэ­хьатэу къыхахыщтым епхыгъэ къэбархэм ащагъэгъозагъэх. Ащ тетэу кIэ­лэ­егъаджэхэм, студентхэм зэраIукIагъэхэм, зэрадэгущыIагъэхэм ныбжьыкIэхэм­кIэ мэхьанэшхо иIагъ.

Сихъу Гощнагъу.